ვაზაგაშვილისა და ხუბულოვის მკვლელობის საქმეზე დაკავებული ირაკლი ფირცხალავას ადვოკატი, პროკურატურის ვერსიების უზუსტობაზე საუბრობს.

როგორც "ინტერპრესნიუსს" ადვოკატმა დავით ხაჟალიამ განუცხადა, თუკი, პროკურატურის ვერსიით, ფირცხალავას ხუბულოვზე შურისძიება ჰქონდა დაგეგმილი, შეეძლო ეს ასეულობით მოწმის გარეშე გაეკეთებინა.

"პროკურატურა აპელირებს, რომ ფირცხალავას გადაწყვეტილი ჰქონდა, მისი ძმის გამო, შური ეძია და მოეცილებინა ხუბულოვი, ამბობს, რომ ამისთვის დაიგეგმა ეს სპეცოპერაცია, ფირცხალავა ადგა და ნახევარი სამინისტრო - მთელი ოპერატიული დეპარტამენტი, მოსმენების სამმართველო ჩარია ამ საქმეში, ასეულობით მოწმე გახადა იმისა, თუ როგორ გაუსწორდა შურისძიების მოტივით ხუბულოვს. თუ ასეთი განზრახვა ფირცხალავას ჰქონდა, სხვა მეთოდებით, ყოველგვარი სპეცოპერაციებისა და ასეულობით მოწმის გარეშე ვერ მოახერხებდა? მგონია, რომ მოახერხებდა", - განაცხადა დავით ხაჟალიამ.

მისი თქმით, რაც შეეხება პროკურატურის იმ განცხადებას, რომ საკონტროლო გასროლებით მოწმეები მოიცილეს, "ესეც ვერ ჯდება ლოგიკაში".

"ესეც არ არის ლოგიკური, იმდენად, რამდენადაც იმ მანქანაში სამი პიროვნება იყო. ერთი დღესაც ცოცხალია და არავის მოუკლავს, აქედან გამომდინარე, ლოგიკურად ჩნდება კითხვა, თუ საკონტროლო გასროლებით იყო მოწმეების ლიკვიდაციის მცდელობა, მესამე მოწმე რატომ დატოვეს?" - აცხადებს ადვოკატი.