მოსამართლემ FBI-ს დასკვნის დედანი ოითხოვა, რომელიც პროკურატურას აქვს და ცოცხალი თავით არ გვაძლევს და ამ მოტივით არ დააკმაყოფილა ჩვენი შუამდგომლობა , - ამის შესახებ ზურაბ ჟვანიას საქმეზე ბრალდებულის, კობა ხარშილაძისა და მიხეილ ძაძამიას ადვოკატმა ბექა ბასილაიამ იმ შუამდგომლობის კომენტირებისას განაცხადა, რომელიც დახურულ დარბაზში განიხილეს.

ბასილაიას თქმით, ეს დასკვნა არსებობს და იგი გაასაჯაროვა ტელეკომპანია "რუსთავი 2"-მა. "პროკურატურამ კარგად იცის, რომ ამ დასკვნაში მოცემული ინფორმაცია პირდაპირ არის კობა ხარშილაძისა და მიხეილ ძაძამიას გამამართლებელი ინფორმაცია. ეს დასკვნა წერტილს უსვამს იმ მანიპულაციებს, რომელსაც ბოლო წლების მანძილზე ვისმენთ, რომ ჟვანიას საქმეში რაღაც არის მომხდარი", - განაცხადა ბექა ბასილაიამ.

ამის საპასუხოდ საქმის პროკურორმა რევაზ ნადიომ აღნიშნა, რომ კობა ხარშილაძისა და მიხეილ ძაძამიას საქმეში განიხილება სამსახურებრივი გულგრილობა და პროკურატურა ვალდებული არ არის FBI-ის დასკვნა დაცვის მხარეს გადასცეს.

"ბრალდებულების ძირითადი არგუმენტები ასეთია, რომ ჩვენ ვემორჩილებოდით ზურაბ ჟვანიას თხოვნას და ამიტომ მივიყვანეთ იმ ადგილას. ანუ პრაქტიკულად ეს აღიარებაა - ისინი ამბობენ, რომ მათი მოვალეობის საწინააღმდეგოდ მიიყვანეს იმ ბინაში და დატოვეს. შესაბამისად, მთელი პასუხისმგებლობა შესაძლო შედეგებზე თავის თავზე აიღეს. თუ ამბობ, რომ მე გადავუხვიე წესს და პირდაპირ მივიღე ეს გადაწყვეტილება, პრემიერის მოთხოვნის საფუძველზე იგი დავტოვე დაცვის გარეშე, პასუხისმგებლობაც უნდა აიღო იმ შედეგზე, რომელიც დადგა", - განაცხადა პროკურორმა.

ამასთან, მან შეაფასა ბრალდებულების შესავალი სიტყვა. რეზო ნადოის განცხადებით, მას მიაჩნია, რომ ხარშილაძისა და ძაძამიას ჩვენებები რაიმე ღირებულების მქონე არ არის.

ზურაბ ჟვანიას დაცვისა და დაცვის ცვლის უფროსების კობა ხარშილაძისა და მიხეილ ძაძამიას წინააღმდეგ საქმის არსებითი განხილვა ნაფიცი მსაჯულების პირობებში 14 ივლისს, 11:00 საათზე განახლდება.