გლდანის მე-6 მიკრორაიონის #2-ე საცხოვრებელ კორპუსთან, სადაც ცოტა ხნის წინ აფეთქება მოხდა, დედაქალაქის მერი დავით ნარმანია, ვიცე პრემიერი კახა კალაძე და რაიონის გამგებელი მივიდნენ. როგორც ჟურნალისტებს თბილისის მერმა განუცხადა, საპატრულო და სამაშველო ბრიგადებთან ერთად, კორპუსში კონსტრუქტორებიც მუშაობენ, რათა შენობის მდგრადობის შესწავლა მოხდეს.

"სამწუხაროდ, საცხოვრებელი კორპუსი ძლიერადაა დაზიანებული. გარდაცვლილია ორი ადამიანი, ეს უკვე დადასტურებულია. მიმდინარეობს სამაშველო ოპერაცია. გამოვიძახეთ კონსტრუქტორებიც და დამატებითი ტექნიკაც, რომელმაც უნდა შეისწავლოს ამ შენობის მდგრადობასთან დაკავშირებული საკითხი, რათა შესაბამისი ოპერაციის განხორციელების პროცესში კიდვე არ მივიღოთ მსხვერპლი", - განაცხადა ნარმანიამ.

რაც შეეხება დაშავებულებს, ნარმანიას ინფორმაციით, ერთის გარდა, დანარჩენების მდგომარეობა სტაბილურია. "აფეთქების გამომწვევი მიზეზი კი საგამოძიებო პროცედურების დასრულების შედეგად უნდა დადგინდეს", - აღნიშნა თბილისის მერმა.