პოლიტიკურ პარტიათა ნაწილი სექტემბრის მეორე ნახევარში არეულობის მოწყობას დაიწყებს, - ამის შესახებ ენერგეტიკისა და წყალმომარაგების მარეგულირებელი ეროვნული კომისიის სხდომაზე "მემარცხენე ალიანსის" წარმომადგენელმა სოსო შატბერაშვილმა განაცხადა.

როგორც შატბერაშვილმა აღნიშნა, "ეს არეულობა რევოლუციით" დასრულდება. სოსო შატბერაშვილი მთელ პასუხისმგებლობას სემეკს აკისრებს, ვინაიდან, მისი თქმით, თუ კომისია დაუშვებს დენის ტარიფის გაძვირებას, მოსახლეობის ისედაც მძიმე სოციალური მდგომარეობა კიდევ უფრო გაუარესდება.

"თქვენ შეგიძლიათ თავიდან აიცილოთ ეს არეულობა. მთელი პასუხისმგებლობა გეკისრებათ თქვენ და ხეთაგურის მიერ დაკომპლექტებულ "თელასს", - განაცხადა შატბერაშვილმა.

ენერგეტიკისა და წყალმომარაგების მარეგულირების ეროვნული კომისია დღევანდელ საჯარო სხდომაზე "თელასისთვის" ელექტროერგიის განაწილების გატარებისა და მოხმარების ტარიფის დადგენაზე მსჯელობს. სხდომას "ქართული დასის" ლიდერი ჯონდი ბაღათურია და "მემარცხენე ალიანსის" წარმომადგენლები სოსო შატბერაშვილი და კახა ძაგანია ესწრებიან.