ჩვენ გვაინტერესებს ვინ შეუკვეთა მკვლელობა, - ასე გამოეხმაურა ბიზნესმენ ბესიკ ხარძიანის დედა მთავარი პროკურატურის მიერ დღეს გავრცელებულ ინფორმაციას იმის შესახებ, რომ ბიზნესმენის მკვლელების ვინაობა დადგენილია.

"ვიცოდით, რომ ვიღაცა მოტოციკლით მოვიდა და მოკლა, მაგრამ ჩვენ გვაინტერებს, ვინ შეუკვეთა მკვლელობა, თორემ ის ისედაც ვიცოდით, რომ ვიღაცა უცხოელი მოვიდა და თავის სახლთან მოკლა ბიჭი. ისედაც ვიცოდით, რომ შეკვეთილი მკვლელობა იყო", - განუცხადა ხარძიანის დედამ ტელეკომპანია "იმედს".

ჟურნალისტის კითხვაზე, აქვს თუ არა ოჯახს ეჭვი, ვინ შეიძლება იყოს მკვლელობის დამკვეთი, ბიზნესმენის დედა აცხადებს, რომ "ოჯახიც დაბნეულია".

"ჩვენც დაბნეულები ვართ. არანაირი ვარაუდი არ გვაქვს. ვარაუდი რომ გვქონდეს, ფრჩხილებით ამოვკორტნიდი თვალებს", - აღნიშნა ხარძიანის დედამ.

პროკურატურამ ბესიკ ხარძიანის მკვლელობა გახსნილად გამოაცხადა. საგამოძიებო უწყების ინფორმაციით, ბიზნესმენი უცხოელმა მამაკაცმა მოკლა, ხოლო მეორე მის დახმარებაშია ბრალდებული. ორივე მამაკაცზე საერთაშორისო ძებნა გამოცხადდა.