პროკურატურა ხარძიანის მკვლელობის საქმეზე უნაკლოდ მუშაობს, - ამის შესახებ ჟურნალისტებს პროკურატურაში გამართული ბრიფინგის შემდეგ მოკლული ბიზნესმენის, ბესიკ ხარძიანის ოჯახის ადვოკატმა, მალხაზ სალაყაიამ განუცხადა.

მისი თქმით, გამოძიების მიმდინარეობით კმაყოფილია. ადვოკატი არ გამორიცხავს, რომ აღნიშნული საქმის ფარგლებში სხვა პირთა დანაშაულიც გამოიკვეთოს.

"ვინ არის მკვლელობის დამკვეთი და ვინ იყო ბესიკ ხარძიანის სიკვდილით დაინტერესებული, ამას გამოძიება დამატებით გასცემს პასუხს ისევე, როგორც წარმატებით გააკეთა დღეს ეს", - განაცხადა მალხაზ სალაყაიამ.

მისი თქმით, გამოძიების მხრიდან ბესიკ ხარძიანის ოჯახს ინტენსიურად მიეწოდებოდა საგამოძიებო მოქმედებების შედეგებზე ინფორმაცია, მათ შორის მათთვის ცნობილი იყო იმ პირთა ვინაობა, ვისაც პროკურატურამ მკვლელობის ბრალდება წარუდგინა.

რაც შეეხება მკვლელობის მოტივს, ადვოკატი აცხადებს, რომ ამასთან დაკავშირებით ვერაფერს იტყვის და ამაზე ისაუბრებენ ის პირები, რომელთაც ბრალი წარედგინა და რომლებიც წარსდგებიან სასამართლოს წინაშე.

ადვოკატი ჟურნალისტების შეკითხვის საპასუხოდ ასევე განმარტავს, რომ ხარძიანის ოჯახი მკვლელობის მოტივად გია უდესიანის ფაქტორს ასახელებს.

"ამის შეფასება მოხდება სასამართლოში, თუმცა ოჯახი იგივე პოზიციაზეა. გარდა ამ ვერსიისა სხვა ვერსია მე არ მსმენია", - განაცხადა მალხაზ სალაყაიამ.