ე.წ. კორტების საქმეზე სააპელაციო სასამართლოში სხდომა 26 თებერვლისთვის გადაიდო. სხდომის გადადების მიზეზი ბრალდებულების ერთ-ერთი ადვოკატის, მალხაზ ველიჯანაშვილის გამოუცხადებლობა გახდა.

ველიჯანაშვილმა სასამართლოში წარადგინა განცხადება, რომელშიც დღევანდელ პროცესზე დაუსწრებლობის მიზეზს განმარტავს. ადვოკატმა პროცესის გადადება სხვა სასამართლო სხდომების დასწრების მოტივით ახსნა.

დღევანდელ პროცესზე ერთ-ერთმა ბრალდებულმა კახა ნაკანმა გააკეთა განცხადება, რომ მომდევნო სხდომებიდან იგი საქმის განხილვას არ დაესწრება. კახა ნაკანმა აღნიშნა, რომ არც პროკურატურაზე და არც მოსამართლეებზე ნაწყენი არ არის და ენდობა საქმის განხილვას. მისი თქმით, იმედი აქვს, რომ ობიექტურად გაგრძელდება სასამართლოს სხდომები. კახა ნაკანმა ასევე აღნიშნა, რომ უდანაშაულოა.

"16 წელი ვმუშაობდი სპეცრაზმში. საყვედურიც კი არ მიმიღია. ვიომე ჩემი ქვეყნის მთლიანობისთვის. ვარ უდანაშაულო. კორეტების სპეცოპერაციის დროს ვასრულებდი ჩემს მოვალეობას. არ გადამიმეტებია უფლებამოსილება და ყოველთვის მზად ვარ იმისთვის, რომ ვიბრძოლო ჩემი ქვეყნისთვის", - განაცხადა კახა ნაკანმა.

პროცესის გადადებას პროკურატურა დაეთანხმა, თუმცა როგორც საქმის პროკურორებმა აღნიშნეს, დაცვის მხარის შუამდგომლობა სხდომის გადადების შესახებ, საქმის განხილვის გაჭიანურებას ემსახურება. სასამართლო სხდომის დასრულების შემდეგ, ბრალდებულის ახლობლებსა და ვაზაგაშვილის ახლობლებს შორის სიტყვიერი დაპირისპირება მოხდა, თუმცა ვითარება მანდატურება განმუხტეს.

ე.წ. კორტების სპეცოპერაციის საქმეზე სხდომა 24 თებერვალს 16:00 საათზე განახლდება.