ქალაქ ახალციხეში 29 მაისს საქართველოში უძველესი ებრაული სინაგოგის დაარსებიდან 275 და მისი განახლებდან 153 წლის იუბილე აღინიშნება. ამის შესახებ ”ინტერპრესნიუსს” ქალაქ ახალციხისმუნიციპალიტეტის მერიადან აცნობეს. მერიის ინფორმაციით, ღონისძიებას საქართველოს მთავრობის, დიპლომატიური კორპუსის, რელიგიური კონფესიების წარმომადგენლები და ისრაელიდან მოწვეული სტუმრები დაესწრებიან. მიღება 14:00 საათზე ახალციხის სინაგოგაში, გურამიშვილის №90–ში გაიმართება. სინაგოგაში ჩატარდება ლოცვაც.
”იუბილესთან დაკავშირებით საზეიმო დახვედრა 15:00 საათზე „ახალციხის ციხეზე“ გაგრძელდება, სადაც მოწვეულ სტუმრებს ქალაქ ახალციხის მერი გიორგი კოპაძე მიესალმება. ღონისძიებაში მონაწილეობას მიიღებენ ახალციხის ფოლკლორული ანსამბლი „მესხეთი“ და ადგილობრივი ქორეოგრაფიული ანსამბლი „მესხიფრთოსანი“. ახალციხის ციხის ტერიტორიაზე მოეწყობა თვითნასწავლი მხატვრის, მიხეილ იაძის ნახატებისა და ახალციხის სამხატვრო სკოლის ნამუშვრების გამოფენა”, - აცხადებენ ახალციხის მუნიციპალიტეტის მერიაში.
მათივე ინფორმაციით, საზეიმო დახვედრის შემდეგ სტუმრები „ახალციხის ციხის“ კომპლექსს და ისტორიულ მუზეუმს დაათვალიერებენ. 18:00 საათზე კი მესხეთის პროფესიულ სახელმწიფო დრამატულ თეატრში ქართულ–ებრაული, 26 საუკუნოვანი მეგობრობისადმი მიძღვნილი კონცერტი გაიმართება. კონცერტში მონაწილეობას ქართული ესტრადის ცნობილი ვარსკვლავები მიიღებენ.