დიღომში, დღეს „ოლიმპიური აუზის“ 2016 წლის სეზონის გახსნა და საზეიმო საღამო გაიმართება. როგორც ”ინტეპრესნიუსს” სპორტისა და ახალგაზრდობის საქმეთა სამინისტროდან აცნობეს, „ოლიმპიური აუზი“ ვიზიტორების მისაღებად მზადაა.

უწყების ინფორმაციით, აუზი 2015 წელს თბილისში ჩატარებული ახალგაზრდული ოლიმპიური ფესტივალის ფარგლებში აშენდა, შესაბამისად, ის აკმაყოფილებს საერთაშორისო სტანდარტებს და მომხმარებელს უმაღლესი ხარისხის მომსახურეობას სთავაზობს, როგორც სპორტული ტურნირების ორგანიზების, ასევე დამსვენებელთა მიღების კუთხით.

”2015 წელს აუზზე ევროპის ახალგაზრდული ოლიმპიური ფესტივალის ფარგლებში ცურვის ტურნირი ჩატარდა, ამიერიდან კი აუზი სპორტსმენებთან ერთად ვიზიტორებსაც უმასპინძლებს. საცურაო კომპლექსი აერთიანებს ორ ღია აუზს და ერთ დახურულ „საჭყუმპალაოს" ბავშვებისათვის. აუზში წყლის ტემპერატურა სტაბილურად 28 გრადუსია. კომპლექსის ტერიტორიაზე ფუნქციონირებს კაფე და ღია ბარი. კომპლექსს აქვს რესურსი ერთდროულად უმასპინძლოს 400-მდე დამსვენებელს. "ოლიმპიური აუზი" მზად არის ვიზიტორების მისაღებად, სეზონი ოფიციალურად დღეს იხსნება”, - ნათქვამია ინფორმაციაში.

ახალი სეზონის გახსნასთან დაკავშირებით, დღეს, 20:00 საათიდან დაგეგმილია სხვადასხვა გასართობი ღონისძიება.