რომან გოცირიძე - ფარულ საგამოძიებო მოქმედებებთან დაკავშირებულ პაკეტზე პრეზიდენტის ხელმოწერა დასაძრახი არ არის
საპარლამენტო ფრაქცია “ნაციონალური მოძრაობის” თავმჯდომარის, რომან გოცირიძის შეფასებით, ფარულ საგამოძიებო მოქმედებებთან დაკავშირებულ პაკეტზე პრეზიდენტის ხელმოწერა გასაკვირი და დასაძრახი არ არის.
როგორც ოპოზიციონერმა დეპუტატმა ჟურნალისტებთან საუბრისას აღნიშნა, პარლამენტის მიერ მიღებული საკანონმდებლო ცვლილებებისთვის პრეზიდენტს ხელი რომ არ მოეწერა, მას ხელს მოაწერდა პარლამენტის თავმჯდომარე და ძალაში პარლამენტის თავმჯდომარის ხელმოწერით შევიდოდა. გოცირიძე ფიქრობს, რომ პრეზიდენტმა კანონპროექტზე ხელმოწერით გაითვალისწინა საკონსტიტუციო სასამართლოს ის გადაწყვეტილება, რომლის მიხედვით, ფარულ მოსმენა-მიყურადებაზე ახალი კანონი ძალაში 2017 წლის 31 მარტისთვის უნდა შესულიყო.
ამასთან, როგორც გოცირიძე აცხადებს, პარლამენტის მიერ მიღებული კანონპროექტი არაფრით განსხვავდება იმ კანონისგან, რომელიც საკონსტიტუციო სასამართლომ ერთხელ უკვე დაიწუნა. ფრაქცია “ნაციონალური მოძრაობის” თავმჯდომარე საკანონმდებლო პაკეტის მთავარ პრობლემად იმ გარემოებას ასახელებს, რომ ფარული მოსმენა-მიყურადების განმახორციელებელი ოპერატიულ-ტექნიკური სააგენტო კვლავ სახელმწიფო უსაფრთხოების სამსახურის სისტემაში რჩება.
v-if="article.gallery" v-html="article.gallery"
