ისეთი შთაბეჭდილება მრჩება, რომ თითოეულმა ოჯახმა ოჯახის წევრი დაკარგა, - ამის შესახებ მსახიობმა ჯემალ ღაღანიძემ მარჯანიშვილის სახელობის თეატრში განაცხადა, სადაც მსახიობ გივი ბერიკაშვილის სამოქალაქო პანაშვიდი მიმდინარეობს.

როგორც ჯემალ ღაღანიძემ აღნიშნა, დიდი მწუხარება დაატყდა მსახიობებს, ქართულ კულტურას და ქართველ ერს.

”მინდა მთელ ერს ვუთხრა სამძიმარი იმის გამო, რომ გივი ბერიკაშვილი წავიდა ამ ქვეყნიდან. ის იყო უდიდესი მსახიობი. იშვიათად თუ ჩვენ გავიხსენებთ ისეთ მსახიობს, რომელიც იყო ასეთი მიწიერი, ნამდვილი, უშუალო სცენაზე და ისეთი ხიბლი ქონოდეს, როგორც გივის ჰქონდა.

სახალხო არტისტები ბევრი ვართ, მათ შორის მეც, მაგრამ გივი განსაკუთრებით სახალხო იყო. ის თითქმის ყველა ოჯახში იყო შესული, ამიტომ მთელი საქართველო გლოვობს და ისეთი შთაბეჭდილებაა, რომ თითოეულმა ოჯახმა ოჯახის წევრი დაკარგა. მე განსაკუთრებით განვიცდი, რადგან მე და გივი თანაკურსებელი ვიყავით”, - განაცხადა ჯემალ ღაღანიძემ.

მისივე თქმით, გივი ბერიკაშვილის სახელი ყოველთვის იქნება და იარსებებს, ვიდრე იარსებებს ქართული თეატრი და ქართულ თეატრს კი სიკვდილი არ უწერია.