ლია გიგაური - ეთნიკური საბავშვო ბაღების პედაგოგ-აღმზრდელებისთვის სახელმწიფო და მშობლიური ენის ცოდნის სტანდარტების დანერგვა 2018 წლიდან დაიწყება
ეთნიკური საბავშვო ბაღების პედაგოგ-აღმზრდელებისთვის სახელმწიფო და მშობლიური ენის ცოდნის სტანდარტების დანერგვა 2018 წლიდან დაიწყება, - ამის შესახებ განათლების მინისტრის მოადგილემ ლია გიგაურმა პარლამენტში, ადრეული და სკოლამდელი აღზრდისა და განათლების კანონის იმპლემენტაციაზე გამართული სამუშაო შეხვედრის შემდეგ ჟურნალისტებს განუცხადა. როგორც მან აღნიშნა ადრეული და სკოლამდელი აღზრდისა და განათლების კანონით სამინისტროს ორი მთავარი ვალდებულება ჰქონდა რაც დღეის მდგომარეობით შესრულებულია.
"განათლების სამინისტროსთვის განსაზღვრული იყო ორი მნიშვნელოვანი ვალდებულება, სტანდარტების შემუშავება, როგორც პედაგოგ-აღმზრდელის პროფესიული სტანდარტის მიმართულებით, ასევე საგანმანათლებლო სტანდარტების მიმართულებით. ორივე ვალდებულება შესრულებულია. დოკუმენტები მზად არის დანერგვისთვის, მაგრამ გადამუშავებისა და ფოკუს ჯგუფებთან შეხვედრის პროცესში გამოიკვეთა მცირე გამოწვევები, კერძოდ, ეთნიკური საბავშვო ბაღებისთვის, პედაგოგ-აღმზრდელის დამატებითი უნარების მოთხოვნა, ეს არის ორი ენის ფლობა, სახელმწიფო და მშობლიური ენის ფლობა. ჩვენ ამ ნაწილში სტანდარტებს გავაძლიერებთ. ასევე ძალიან დიდი მნიშვნელობა აქვს ისეთ მცირე კონტიგენტიან სოფლებში, სადაც საბავშვო ბაღები ვერ დაკომპლექტდება იმ წესით როგორც კანონით არის განსაზღვრული, შემუშავებული იქნას გარკვეული კომპლექტური ჯგუფების სტანდარტები და პრინციპები, რომელზეც ჩვენ მუშაობას დავიწყებთ და ამ მიმართულებით კომისიისგან მივიღეთ თანხმობა", - განაცხადა ლია გიგაურმა.
მინისტრის მოადგილის თქმით, შესაბამისი სტანდარტების დანერგვა 2018 წლიდან დაიწყება.
v-if="article.gallery" v-html="article.gallery"
