ე.წ. კორტების სპეცოპერაციის საქმეზე სააპელაციო სასამართლოს განაჩენი უზენაეს სასამართლოში გასაჩივრდება, - ამის შესახებ მსჯავრდებულთა ადვოკატმა მალხაზ ველიჯანაშვილმა პროცესის დასრულების შემდეგ ჟურნალისტებთან განაცხადა.

როგორც ველიჯანაშვილმა აღნიშნა, დაცვის მხარეს არ აქვს არც უზენაესი სასამართლოს ობიექტურობის იმედი და აცხადებს, რომ საბოლოოდ, საქმეს ევროპულ სასამართლომდე მიიტანს.

”განაჩენი არის უსამართლო და უკანონო იმის გათვალისწინებით, რომ საქმეში მტკიცებულებები არ არსებობს. შეუძლებელია დასაბუთებაზე ვისაუბროთ. რა თქმა უნდა, განაჩენი გასაჩივრდება, თუმცა აზრს კარგავს ყველაფერი. სასამართლოშივე დადასტურდა ყველა ბრალდებულის უდანაშაულობა. ფაქტია, რომ სასამართლო ზეგავლენის ქვეშაა და ამან განაპირობა უკანონო განაჩენი. ახლა ყველაზე დიდი მოლოდინი ევროპული სასამართლოსი გვაქვს, სადაც საქმეს აუცილებლად წავიღებთ”, - განაცხადა მალხაზ ველიჯანაშილმა.

სააპელაციო სასამართლომ ე.წ. კორტების სპეცოპერაციის საქმეზე საქალაქო სასამართლოს გადაწყვეტილება ძალაში დატოვა ყველა ნაწილში. შესაბამისად, ირაკლი ფირცხალავა და გიორგი ცააძე პატიმრობაში დარჩნენ.