ე.წ. კორტების სპეცოპერაციის საქმეზე მსჯავრდებულები ირაკლი ფირცხალავა და გიორგი ცააძე შიმშილობენ, - ამის შესახებ ადვოკატმა მალხაზ ველიჯანაშვილმა დღეს გამართულ პრესკონფერენციაზე განაცხადა.
მისივე თქმით, ფირცხალავამ და ცააძემ შიმშილობა ოთხი დღის წინ დაიწყეს. ისინი მხოლოდ წყალს იღებენ.
ადვოკატის განმარტებით, ისინი ითხოვენ "კორტების საქმეზე" სპეცრაზმელების ჩვენებები გაბათილდეს. ფირცხალავა და ცააძე მიიჩნევენ, რომ ჩვენების მიცემამდე სპეცრაზმელები ერთ საკანში იყვნენ მოთავსებული, რაც კანონდარღვევაა.
როგორც ველიჯანაშვილმა აღნიშნა, მოშიმშილეები ასევე ითხოვენ მოწმეების - გოგატიშვილის და მირიანაშვილის საქმეზე გამოძიებას.
"ამ მოწმეებმა ცრუ ჩვენება მისცეს სასამართლოს და ამაზეც ვითხოვთ გამოძიებას",- განაცხადა ველიჯანაშვილმა.