ე.წ. კორტების სპეცოპერაციის საქმეზე ბრალდებულ სპეცრაზმელებს ბრალი გადაუკვალიფიცირდათ. დამამძიმებელ გარემოებებში განზრახ მკვლელობის ნაცვლად 7 სპეცრაზმელს ახლა უკვე ბრალი სამსახურებრივი უფლებამოსილების გადამეტებაში ედებათ.

ბრალის გადაკვალიფიცირების შუამდგომლობა პროკურორმა ვლადიმერ ვექილიანმა დღევანდელ სასამართლო პროცესზე დააყენა. როგორც პროკურორმა განმარტა, ორი ინსტანციის სასამართლომ სპეცრაზმელების ხელმძღვანელის, კახაბერ ნაკანის მიმართ განაჩენი სწორედ ამ მუხლით გამოიტანა და შესაბამისად, პროკურატურამ ამ სპეცრაზმელების მიმართაც მიიღო გადაწყვეტილება ბრალის გადაკვალიფიცირებასთან დაკავშირებით.

გარდა ამისა, პროკურორმა სასამართლოს, სააპელაციოს სასამართლოს განაჩენიც წარუდგინა, რომლის მიხედვითაც, კორტების სპეცოპერაციის საქმეზე მსჯავრდებულების, ირაკლი ფირცხალავას, გიორგი ცააძისა და კახა ნაკანის მიმართ გამოტანილი განაჩენი უცვლელი დარჩა. პროკურორმა აღნიშნული განაჩენის საქმეში მტკიცებულებად დართვა იშუამდგომლა, რაც მოსამართლემ დააკმაყოფილა.

ე.წ. კორტების სპეცოპერაციის საქმეზე სპეცრაზმის 7 თანამშრომელს აქვს წაყენებული. მათ აღკვეთის ღონისძიების სახით თავდაპირველად პატიმრობა ჰქონდათ შეფარდებული, თუმცა მოგვიანებით, ბრალდებულები პატიმრობიდან გირაოს სანაცვლოდ გათავისუფლდნენ.