პანკისის ხეობაში სპეცოპერაციის დროს დაჭრილი თემირლან მაჩალიკაშვილის ბებია შვილიშვილის თბილისში, ბერი გაბრიელ სალოსის ქუჩაზე ჩატარებულ სპეცოპერაციასთან და ახმედ ჩატაევთან რაიმე კავშირს გამორიცხავს. ელენე მაჩალიკაშვილი ”ინტერპრესნიუსთან” საუბარში ხეობაში გამთენისას მომხდარის დეტალებს იხსენებს.

"სამი საათი იყო და მაღლა სართულზე სროლის ხმა გავიგე, ჩემს მძინარე შვილიშვილს საწოლში ესროლეს. ეზო სავსე იყო სამართალდამცველებით, ჩემი შვილი და რძალი დაკავებული ყავდათ და ადგომის საშუალებას არ აძლევდნენ. არაფერი გვითხრეს, ისე დაიწყო ეს ყველაფერი. გამორიცხულია თემირლანის კავშირი ახმედ ჩატაევთან. თუ დამნაშავე იყო, საწოლში მძინარეს რატომ ესროლეს, ისე დაეკავებინათ. ვიცით, რომ დაჭრილია, მაგრამ არ ვიცით ახლა სად ყავთ და როგორ არის”,- განაცხადა ელენე მაჩალიკაშვილმა.