ნინო ლომჯარია - ოჯახის წევრების განცხადება და სუს-ის მიერ გავრცელებული ინფორმაცია, თუ რა ვითარებაში მოხდა პირის დაჭრა, ურთიერთგამომრიცხავია

სახალხო დამცველის, ნინო ლომჯარიას განცხადებით, პანკისის ხეობაში ჩატარებული სპეცოპერაციის დროს დაჭრილი პირის ოჯახის წევრებისა და სუს-ის მიერ გაკეთებული განცხადებები ურთიერთგამომრიცხავია.

“ჩვენი წარმომადგენელი უკვე ესაუბრა დაჭრილის ოჯახის წევრებს. ამ ეტაპზე რაც შემიძლია გითხრათ არის ის, რომ ოჯახის წევრების განცხადება და სუს-ის მიერ გავრცელებული ინფორმაცია, თუ რა ვითარებაში მოხდა პირის დაჭრა, ურთიერთგამომრიცხავია. ჩვენ რა თქმა უნდა, ჩავერთვებით საკითხის შესწავლაში. ველოდებით გარკვეულ ინფორმაციებს და გვექნება შესაბამისი პოზიცია, რომელსაც დავაფიქსირებთ“, - განუცხადა ჟურნალისტებს ნინო ლომჯარიამ.

სუს-მა ტერორიზმის დაფინანსების, ტერორისტული საქმიანობის სხვაგვარი მატერიალური მხარდაჭერის და რესურსებით უზრუნველყოფის ბრალდებით 5 პირი დააკავა.

სახელმწიფო უსაფრთხოების სამსახურის მიერ გავრცელებული ინფორმაციით, კონტრტერორისტული დეპარტამენტის მიერ, დღეს დილით თბილისსა და ახმეტის რაიონის სოფლებში, დუისსა და ომალოში დაკავებულ იქნა საქართველოს 5 მოქალაქე: ზურაბ გორნაკაშვილი, რუსლან ალდამოვი, რამაზ მარგოშვილი, ბადურ ჩოფანაშვილი და თემირლან მაჩალიკაშვილი. უწყების ცნობით, დაკავებული პირები დაკავშირებულები არიან 21-22 ნოემბერს ბერი გაბრიელ სალოსის ქუჩაზე ჩატარებული სპეცოპერაციის შედეგად განეიტრალებული დაჯგუფების წევრებთან და წარმოადგენდნენ მათ ხელშემწყობ პირებს.

ამასთან, სუს-ის ინფორმაციით, თემირლან მაჩალიკაშვილი დაკავებისას შეეცადა წინააღმდეგობა გაეწია სამართალდამცავებისთვის, კერძოდ უნდოდა მოქმედებაში მოეყვანა ხელყუმბარა, რა დროსაც დანაშაულებრივი ქმედების აღსაკვეთად უკიდურესი აუცილებლობიდან გამომდინარე გამოყენებული იქნა პროპორციული ძალა და მოხდა თემირლან მაჩალიკაშვილის მისამართით გასროლა, რის შედეგადაც ამ უკანასკნელმა თავის არეში მიიღო ცეცხლნასროლი დაზიანება. იგი ამჟამად ჰოსპიტალიზირებულია.

დიმიტრი ცქიტიშვილი - არ მინდა დავიჯერო, რომ „ქართულ ოცნებას“ იგივე დაემართა, რაც „ნაციონალურ მოძრაობას“
ქართული პრესის მიმოხილვა 09.12.2019
რამაზ საყვარელიძე - არც ხელისუფლება ჰგავს პოლიტიკის დიდოსტატს და არც ოპოზიცია, ამიტომ არც ისე იწვიმებს, როგორც ისმის რევოლუციის ჭექა-ქუხილი