ჩემი პირველი მოადგილე არ იმყოფებოდა სასჯელაღსრულების დაწესებულებაში, არც გია სოსანაშვილთან და არც არავისთან, - ამის შესახებ საქართველოს მთავარმა პროკურორმა ირაკლი შოთაძემ იური ვაზაგაშვილის მკვლელობაში მსჯავრდებულ გია სოსანაშვილის განცხადების პასუხად ჟურნალისტებთან საუბრისას აღნიშნა.

შოთაძე კატეგორიულად გამორიცხავს, რომ სოსანაშვილს მისმა მოადგილემ ბრალის აღიარების სანაცვლოდ თანხა შესთავაზა.

„ეს არის ცალსახად ტყუილი. სოსანაშვილი არის მსჯავრდებული განსაკუთრებით სისასტიკით ჩადენილ მკვლელობაში. მან სიცოცხლეს გამოასალმა იური ვაზაგაშვილი მისივე შვილების სასაფლაოზე. შესაბამისად, ამ ადამიანისთვის, მისი მორალური მხარიდან გამომდინარე, ტყუილები სათაკილო არ უნდა იყოს. რაც შეეხება იმ ფაქტს, თითქოს ჩემი პირველი მოადგილე სასჯელაღსრულების დაწესებულებაში იმყოფებოდა, ეს არის სიცრუე. ჩემი პირველი მოადგილე არ იმყოფებოდა სასჯელაღსრულების დაწესებულებაში, არც გია სოსანაშვილთან და არც არავისთან. ჩემი მოადგილეები სასჯელაღსრულების დაწესებულებებში არ დადიან, ამისთვის არსებობენ შესაბამისი საჯარო მოხელეები, პროკურორები და გამომძიებლები“, - განაცხადა შოთაძემ.

იური ვაზაგაშვილის მკვლელობაში მსჯავრდებული გია სოსანაშვილი აცხადებს, რომ მთავარი პროკურორის პირველი მოადგილე მამუკა ვასაძე მას ბრალის აღიარების სანაცვლოდ თანხას სთავაზობდა.