ბარათაშვილის ქუჩაზე შენობიდან შუშის ჩამოვარდნის შედეგად დაშავებული სამი მოზარდიდან ერთს თავზე ნაკერების დადება დასჭირდა. ამის შესახებ „ინტერპრესნიუსს“ „ამტელ ჰოსპიტალის“ კლინიკის დირექტორმა ლაშა მაჭარაშვილმა განუცხადა.

მისივე თქმით, აღნიშნულ მოზარდს თავის არეში დიდი ზომის ჭრილობა აღენიშნებოდა, რის გამოც ქირურგიული ჩარევა დასჭირდა. დანარჩენ ორ მოზარდს კი თავზე მცირე ნაკაწრები და დაჟეჟილობები აღეიშნებათ.

კლინიკის დირექტორის განცხადებით, დაკვირვების მიზნით შესაძლოა მოზარდები დღეს კლინიკაში დარჩნენ. ამასთან, ბარათაშვილის ქუჩაზე, შენობიდან შუშის ჩამოვარდნის შედეგად დაშავებული კიდევ სამი ბავშვი ინგოროყვას კლინიკაში იმყოფება. მათგან ერთს ამ წუთებში ოპერაცია უტარდება. მას ჭრილობები თავის არეში აქვს. დანარჩენი ორის მდგომარეობა კი დამაკმაყოფილებელია.