ჯანდაცვის მინისტრის მოადგილის ზაზა სოფრომაძის განცხადებით, ბარათაშვილის ქუჩაზე დღეს დაშავებული ბავშვების სამკურნალოდ ყველა სამედიცინო ჩარევას სახელმწიფო თავის თავზე აიღებს. მისი თქმით, ერთი ბავშვის მდგომარეობა ძალიან მძიმეა, რომელსაც ინგოროყვას კლინიკაში ოპერაცია უტარდება. სოფრომაძის თქმით, პრემიერის დავალების შესაბამისად, სახელმწიფო თავის თავზე აიღებს ხარჯებს.

"დაშავებულია 6 ბავშვი. 3 მოთავსებულია ”ამტელ ჰოსპიტალში” და 3 ინგოროყვას კლინიკაში. ინგოროყვას კლინიკაში მოთავსებული ბავშვებიდან ერთის მდგომარეობა არის ძალიან მძიმე, უკვე საოპერაციოშია. ექიმები ყველა ღონეს ხმარობენ მის გადასარჩენად. ყველა სამედიცინო ჩარევას სახელმწიფო თავის თავზე აიღებს, მათ შორის პრემიერის სპეციალური დავალების შესაბამისად, თუ საჭირო გახდა ბავშვის უცხოეთში გადაყვანას ან უცხოეთიდან სპეციალისტების ჩამოყვანას",- განაცხადა სოფრომაძემ, რომელიც ამ წუთებში ინგოროყვას კლინიკაში იმყოფება.