ხორავას ქუჩაზე მოზარდების მკვლელობის საქმეზე ექსპერტიზის ჩასატარებლად ბრიტანელი ექსპერტები საქართველოში დაახლოებით 10 დღეში ჩამოვლენ. ამის შესახებ ჟურნალისტებს საქმეზე ერთ-ერთი ბრალდებული არასრულწლოვანის ადვოკატმა, ტარიელ კაკაბაძემ განუცხადა.
მისი ინფორმაციით, ექსპერტები ნივთმტკიცებებთან სავარაუდოდ ორი დღის განმავლობაში იმუშავებენ. კაკაბაძე დარწმუნებულია, რომ ბრიტანელი ექსპერტების დასკვნა საქმეში არსებულ ყველა კითხვას გასცემს პასუხს.
"ბრიტანელი ექსპერტები საქართველოში დაბრუნებას დაახლოებით 10 დღეში აპირებენ, რათა გააგრძელონ მუშაობა იმ ნივთმტკიცებებთან, რომლებიც გადმოგვეცემა ბრალდების მხარის მიერ. ამ ეტაპზე ნამდვილად არაფერი უდგას წინ იმას, რომ გადმოგვეცეს ნივთმტკიცებები, თუმცა ველოდებით საქართველოში ექსპერტების ჩამოსვლას. მძიმე სამუშაო გრაფიკიდან გამომდინარე მათ არ შეუძლიათ დღეების და თვეების განმავლობაში დარჩნენ საქართველოში. შესაბამისად, ისინი დაახლოებით თვეში ორჯერ შეძლებენ საქართველოში ჩამოსვლას და მუშაობას ექსპერტიზებზე. დარწმუნებული ვარ, ექსპერტების მიერ დადებული დასკვნა უპასუხებს იმ შეკითხვებს, რასაც ბრალდების მხარის ვერც ერთი მტკიცებულება ვერ პასუხობს", - განაცხადა ტარიელ კაკაბაძემ.