„ქართული ოცნების“ თავმჯდომარე ბიძინა ივანიშვილმა კიდევ ერთი მიზეზი დაასახელა, რის გამოც ის პოლიტიკაში დაბრუნდა და პარტიას სათავეში ჩაუდგა.

როგორც ბიძინა ივანიშვილმა „ქართული ოცნების“ ყრილობაზე სიტყვით გამოსვლისას განაცხადა, პოლიტიკაში დაბრუნება მან კონკურენტუნარიანი ოპოზიციის არარსებობის გამო გადაწყვიტა.

„მეორე პრობლემა, რამაც დღევანდელი გადაწყვეტილების მიღებისკენ მიბიძგა, კონკურენტუნარიანი ოპოზიციის არარსებობაა. ჩვენი ოპონენტების უღირსი ნაწილი, ხელუსუფლებასთან არგუმენტირებული, გონივრული, უკეთესი ალტერნატივების შეთავაზებისა და დასაბუთებული კრიტიკის ნაცვლად, შეპყრობილია მხოლოდ ანტიდემოკრატიული რევანშის წყურვილით. ისინი ერთმანეთს ეჯიბრებიან არა უკეთესი პროგრამების წარმოდგენაში, არამედ ქვეყანაში უპერსპექტივობისა და უიმედობის ატმოსფეროს დანერგვაში, რადგან კარგად იციან, რომ მხოლოდ ეროვნული პესიმიზმია მათი ის ერთადერთი პლაცდარმი, რომლიდანაც შეძლებენ ქართულ დემოკრატიაზე შურისძიებას. ხალხის ნდობის არ ქონის გამო, ისინი ვერ ხედავენ დემოკრატიული პროცედურებით ხელისუფლებაში მოსვლის პერსპექტივას და ამიტომაც ცდილობენ ისეთი განწყობის შექმნას, როდესაც არეულობა სიტუაციის შეცვლის ერთადერთ გზად უნდა მოეჩვენოს ხალხს“, - განაცხადა ბიძინა ივანიშვილმა.