ცალსახად და თამამად შეიძლება ითქვას, რომ კლუბებში საგამოძიებო მოქმედებების ჩატარებისას პოლიცია კანონის ჩარჩოებში მოქმედებდა, - ამის შესახებ ჟურნალისტებს შინაგან საქმეთა მინისტრის მოადგილემ ნათია მეზვრიშვილმა განუცხადა.

მეზვრიშვილი ამბობს, რომ პოლიცია საზოგადოების მხრიდან მხოლოდ მადლობას იმსახურებს.

“თქვენ ყველამ დაინახეთ სრულიად ახალი პოლიცია, რომელიც ორიენტირებული იყო იქ მყოფი მოქალაქეების უფლებების დაცვაზე და არა უფლებების დარღვევაზე. ამ დრომდე უფლების დარღვევის არც ერთი ფაქტი არ დაფიქსირებულა, მათ შორის როგორც ჩემთვის ცნობილია, არც სახალხო დამცველის ოფისში. თუ რაიმე გადაცდომებს ინდივიდუალურად ჰქონდა ადგილი, ჩვენ მზად ვართ როგორც სახალხო დამცველთან, ასევე შესაბამის ორგანოებთან ამ საკითხებთან დაკავშირებით ვითანამშრომლოთ და ჩვენს ხელთ არსებული ყველა ინფორმაცია მივაწოდოთ. ერთადერთი, რასაც ამ დღეების განმავლობაში პოლიცია იმსახურებს, არის მადლობა”, - განაცხადა ნათია მეზვრიშვილმა.