რაც შეეხება კლუბების ადმინისტრაციის პასუხისმგებლობას, ჩვენ ამ მიმართულებით გამოძიება ჯერ არ დაგვისრულებია, - ამის შესახებ შინაგან საქმეთა მინისტრის მოადგილემ, ნათია მეზვრიშვილმა სამინისტროში არასამთავრობო ორგანიზაციებთან და სახალხო დამცველის წარმომადგენლებთან გამართული შეხვედრის შემდეგ განაცხადა.

მეზვრიშვილმა უპასუხა ჟურნალისტის კითხვას იმის შესახებ, თუ რატომ არ მიეცნენ პასუხისგებაში კლუბების ხელმძღვანელები, თუკი მათ ტერიტორიაზე ნარკოტიკული საშუალებები იყიდებოდა.

“ყველა გამსაღებელი, რომელიც იდენტიფიცირებული იყო, დაკავებულია, მათ შორის ერთი კლუბის ტერიტორიაზე, ხოლო 7 - გარეთ. რაც შეეხება ადმინისტრაციის პასუხისმგებლობას, ჩვენ ამ მიმართულებით გამოძიება ჯერ არ დაგვისრულებია. გამოძიება გრძელდება, დადგინდება შესაბამისი კონტაქტები, მოპოვებული იქნება მტკიცებულებები და თუკი ასეთი მტკიცებულებები გვექნება, შესაბამისი პირები მიეცემიან პასუხისგებაში“, - განაცხადა მეზვრიშვილმა.