სოზარ სუბარი - ჭუბერში ზარალი ძალიან დიდია, 40-მდე ადამიანი რჩება გარესამყაროს მოწყვეტილი, რომლებთანაც სურსათი ცხენით შეგვაქვს

ჭუბერის თემში, სოფელ ტიტაში, 40-მდე ადამიანი გარესამყაროს არის მოწყვეტილი, - ამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა „ინტერპრესნიუსს“ განუცხადა.

თუმცა, სუბარის ინფორმაციით, მათ საკვები პროდუქტები და მედიკამენტები ჯერ ვეტმფრენით მიაწოდეს, ამ ეტაპზე კი, ცხენების საშუალებით დამატებითი ნივთებიც მიეწოდებათ.

„სტიქიის შედეგად მოწყვეტილი არც ერთი სოფელი არ ყოფილა, უბრალოდ, იქ შეუძლებელი იყო მძიმე ტექნიკის გადაყვანა. 10 კილომეტრიანი გზის მოვლის შემთხვევაში, ამ მოსახლეობასაც ვუკავშირდებოდით. ერთი პატარა სოფელი - ტიტა რჩება პრობლემად, სადაც 2 ოჯახი ცხოვრობს. ეს ორი ოჯახი გახდა მწყემსების თავშესაფარი, რომლებიც სოფლის ირგვლივ განლაგებულ იალაღებზე იყვნენ. მწყემსები პრაქტიკულად, სოფელს მოწყვეტილები არიან, თუმცა, ჩამოდიან და ამ მოსახლეობასთან ცხოვრობენ. იქ რომ სურსათის და მედიკამენტების პრობლემა არ გაჩენილიყო, პირველ დღეებში ვეტმფრენებით მივაწოდეთ ყველა საჭირო მედიკამენტი და სურსათი. ქალები და ბავშვები გადმოვიყვანეთ ასევე ვეტმფრენებით. ახლა ცხენების საშუალებით შეგვაქვს სურსათი და პარალელურად მიმდინარეობს სოფელთან დამაკავშირებელი გზის აღდგენა. ახლა ამ სოფელში იმყოფება 40-მდე ადამიანი, ვინც გარესამყაროსაა მოწყვეტილი. თუმცა, გზის პრობლემის გარდა, მათ სხვა პრობლემა არ აქვთ, კომუნიკაცია ტელეფონით ხორციელდება და სურსათი ცხენების საშუალებით შეგვაქვს. ვერტმფრენთან დაკავშირებით, მინდა განსაკუთრებული მადლობა ვუთხრა სამაშველო სამსახურს, რადგან მათ სოფელ ბეჩოში ადამიანი წყლიდან ამოიყვანეს და ზუსტად 1 წუთის მერე ეს ადგილი არ არსებობდა, ის ადიდებულმა მორევმა წალეკა და გადარჩენის შანსი ნულის ტოლი იქნებოდა. პირადად პრემიერ-მინისტრი მამუკა ბახტაძე იყო ვერტმფრენში და იდეაში, ამ ვერტმფრენით ის უნდა გამოფრენილიყო ჭუბერში, თუმცა, ვერტმფრენი სამაშველო ოპერაციაზე გაგზავნა და თვითონ ავტომანქანით წამოვიდა“, - განაცხადა სუბარმა.

რაც შეეხება ზარალს, მისი თქმით, სრულად არის აღწერილი, დათვლილი, თუმცა, კონკრეტული რიცხვის დასახელებისგან თავს შეიკავებს, „რადგან უნდა ჩატარდეს ექსპერტიზა და ამის შემდეგ დასახელდება“.

„მხოლოდ ის შემიძლია გითხრათ, რომ ძალიან მაღალი რიცხვია“, - აღნიშნა სუბარმა.

ცნობისთვის, სოფელ ჭუბერში, 5 ივლისს, მდინარე ნენსკრას ადიდებამ მთის ნაწილის ჩამოშლა გამოიწვია. სტიქიის შედეგად, სოფლებთან დამაკავშირებელი გზები დაიტბორა, დაზიანდა ხიდები და საცხოვრებელი სახლები.

თენგიზ ფხალაძე - საშიშ ფაზაში ვიმყოფებით, მსოფლიოში მიმდინარე პროცესები ყურადღების მიღმა გვრჩება, ყველაფერს ვაკეთებთ სახელმწიფოს ჩამოსაშლელად, მოწინააღმდეგეს მხოლოდ ისღა რჩება, რომ ამ პროცესში ხელი არ შეგვიშალოს
ქართული პრესის მიმოხილვა 16.09.2021
იოსებ ბარათაშვილი - თუ უმოკლეს ვადებში არ გამოქვეყნდა რა აუცილებლობით კეთდებოდა ფარული ჩანაწერები, ხელისუფლებას მოუწევს პასუხისმგებლობის აღება ძალზე მძიმე ბრალდებაზე
ნიუ ვიჟენ უნივერსიტეტი საზოგადოებას კინემატოგრაფიაში ამერიკულ სამაგისტრო პროგრამას სთავაზობს
კრიპტალი მომხმარებლებს 1 მილიონ შიბა ინუს (ელექტრონული ფული) ჩუქნის
BDO Digital-ი SWIFT-ის ოფიციალური პარტნიორი გახდა
BDO Digital-ი კომპანიებს აქტივების მართვის თანამედროვე გადაწყვეტას სთავაზობს