აშშ-ს პრეზიდენტმა დონალდ ტრამპმა „ბრექსიტის“ თემაზე ისაუბრა და ტერეზა მეის მთავრობის საქმიანობა შეაფასა. ჟურნალისტების კითხვაზე, რომელიც ეხებოდა დიდი ბრიტანეთის მთავრობის გადაწყვეტილებას, ევროკავშირთან გარკვეული კავშირი შეინარჩუნოს, მიუხედავად იმისა, რომ „ბრექსიტის“ მსურველები ევროკავშირიდან ქვეყნის სრულ გაყვანას მოითხოვდნენ, დონალდ ტრამპმა განაცხადა, რომ „ბრექსიტი“ მაინც „ბრექსიტად“ რჩება.

„ხალხმა გამოსვლას დაუჭირა მხარი, ამიტომ მე მეგონა, რომ მთავრობა ამას გააკეთებდა, თუმცა, შესაძლოა, ისინი ცოტა სხვა გზას გაუყვნენ, ამიტომ მე ვერ გეტყვით, არის თუ არა მთავრობის გეგმა ის, რასაც ხალხი ითხოვდა“, - განაცხადა ტრამპმა.