ავტორიზაციის საბჭოს თავმჯდომარის, დავით აფრასიძის განცხადებით, საბჭოს 27 აგვისტოს სამუშაო დღის წესრიგი უკვე შედგენილია და მასში შავი ზღვის საერთაშორისო უნივერსიტეტის საკითხზე მსჯელობა არ შედის.

როგორც აფრასიძემ “ინტერპრესნიუსს” განუცხადა, საკითხების განხილვის დღის წესრიგს ავტორიზაციის საბჭო არ ადგენს, არამედ მათ აღნიშნულთან დაკავშირებით განათლების ხარისხის განვითარების ეროვნულმა ცენტრმა უნდა მიმართოს.

შავი ზღვის საერთაშორისო უნივერსიტეტის ადმინისტრაციამ ფინანსთა სამინისტროს საგამოძიებო სამსახურის მიერ დაკისრებული თანხა - 712 000 ლარის ოდენობით დღეს დაფარა. შესაბამისი დოკუმენტი ჟურნალისტებს უნვერსიტეტის რექტორმა ილიას ჩილოღლუმ წარუდგინა. ამასთან, შავი ზღვის საერთაშორისო უნივერსიტეტის ადმინისტრაციამ ავტოზაციის საბჭოს მიღებული გადაწყვეტილების გადასახედად ვადა 27 აგვისტომდე მისცა. ავტორიზაციის საბჭომ შავი ზღვის საერთაშორისო უნივერსიტეტს სტუდენტების მიღება ერთი წლით, სწორედ ფინანსური დავალიანების გამო შეუზღუდა.