პროკურატურის ინფორმაციით, უწყებას ოფიციალურად არ მიუღია მაჩალიკაშვილების ოჯახის მოთხოვნა მთავარ პროკურორთან შეხვედრის თაობაზე. როგორც „ინტერპრესნიუსს“ მთავარი პროკურატურის პრესსამსახურში განუცხადეს, უწყებაში მაჩალიკაშვილების ოჯახის ადვოკატის ოფიციალური მოთხოვნა არ არის შესული. ამასთან, პროკურატურაში დამატებით არ აკეთებენ კომენტარს, ოფიციალური მიმართვის შემდეგ შეხვდება თუ არა მთავარი პროკურორი მაჩალიკაშვილების ოჯახს.

პანკისის ხეობაში ჩატარებული სპეცოპერაციისას მოკლული თემირლან მაჩალიკაშვილის ოჯახი ახალ მთავარ პროკურორთან, შალვა თადუმაძესთან შეხვედრას ითხოვს.

როგორც „ინტერპრესნიუსს“ მაჩალიკაშვილის ოჯახის ადვოკატმა მარიამ კუბლაშვილმა განუცხადა, ოფიციალურ მოთხოვნას თადუმაძესთან შეხვედრის თაობაზე პროკურატურაში უახლოეს პერიოდში შეიტანენ.

ამასთან, კუბლაშვილის განცხადებით, თემირლან მაჩალიკაშვილის მკვლელობაში დამნაშავე პირების დასჯის ნაცვლად, საგამოძიებო ორგანოები მალხაზ მაჩალიკაშვილის შანტაჟით არიან დაკავებულები და ცდილობენ მაჩალიკაშვილების გაჩუმებას.