ხორავას ქუჩაზე მოზარდების მკვლელობის საქმეზე ცრუ ჩვენების მიცემაში ბრალდებული არასრულწლოვანი დ.ღ. პატიმრობაში რჩება. დღევანდელ სასამართლო პროცესზე მოსამართლემ ბრალდებულის მიმართ გამოყენებული აღკვეთის ღონისძიება გადასინჯის საკითხი განიხილა და დ.ღ. პატიმრობაში დატოვა. ამასთან, დღევანდელ სხდომაზე მხარეებმა შესავალი სიტყვებიც თქვეს. საქმის პროკურორმა ბესიკ ქვარცხავამ სხდომის დასრულების შემდეგ განაცხადა, რომ მომდევნო პროცესიდან სახელმწიფო ბრალდება საკუთარი მტკიცებულებების გამოკვლევას დაიწყებს.

„დღეს დაიწყო საქმის არსებითი განხილვა ბრალდებულ დ.ღ.-ს მიმართა წარმოებულ სისხლის სამართლის საქმეზე. დღევანდელ სხდომაზე ბრალდების მხარემ წარადგინა შესავალი სიტყვა და ასევე, ამავე სხდომაზე სასამართლოს მხრიდან გადაისინჯა ბრალდებულის მიმართ გამოყენებული აღკვეთის ღონისძიება. სასამართლომ სრულად გაიზიარა ბრალდების მხარის მოსაზრებები, არგუმენტები და ბრალდებულის მიმართ შეფარდებული აღკვეთის ღონისძიება - პატიმრობა ძალაში დატოვა. რაც შეეხება მტკიცებულებებს, შემდეგი სხდომიდან გაგრძელდება მოცემულ სისხლის სამართლის საქმეზე მტკიცებულებების გამოკვლევა", - განაცხადა ბესიკ ქვარცხავამ.

სახელმწიფო ბრალდება დ.ღ.-ს გამოძიებისთვის და სასამართლოსთვის ცრუ ინფორმაციისა და ცრუ ჩვენების მიცემას ედავება.

შეგახსენებთ, რომ ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.

ხორავას ქუჩაზე მოზარდების მკვლელობის საქმის ხელახალი ძიება მას შემდეგ დაიწყო, რაც თბილისის საქალაქო სასამართლოში მკვლელობაში ბრალდებული ორი მოზარდის მიმართ განაჩენი დადგა.