ანა ნაცვლიშვილი - მნიშვნელოვანია, რომ კანონით გათვალისწინებული ყველა ფორმატი იყოს გამოყენებული "საზოგადოებრივი მაუწყებლის“ თანამშრომლების კითხვებზე დროული და სრულყოფილი პასუხების გასაცემად

საქართველოს პრეზიდენტის საპარლამენტო მდივანმა ანა ნაცვლიშვილმა და პოლიტიკურმა მდივანმა ფიქრია ჩიხრაძემ "საზოგადოებრივი მაუწყებლის“ იმ თანამშრომლებთან გამართეს შეხვედრა, რომლებმაც აგვისტოს ბოლოს მენეჯმენტის მიერ შეთავაზებული შრომითი ხელშეკრულებების პირობები გააპროტესტეს და განაცხადეს, რომ "საზოგადოებრივ მაუწყებელში“ არ არსებობს გამჭვირვალე და თანმიმდევრული შრომის პოლიტიკა, მიღებული გადაწყვეტილებები კი, დაუსაბუთებელია.

ანა ნაცვლიშვილის განცხადებით, მნიშვნელოვანია, რომ კანონით გათვალისწინებული ყველა ფორმატი იყოს გამოყენებული იმისთვის, რომ მაუწყებლის თანამშრომლებში არსებულ ძალიან ბევრ კითხვას დროულად და სრულყოფილად გაეცეს პასუხი.

„საზოგადოებრივი მაუწყებლის“ თანამშრომლები არხზე არაერთ პრობლემას ხედავენ. ეს ეხება როგორც შრომით პოლიტიკას და ბოლო პერიოდში დაწყებულ ოპტიმიზაციის პროცესს, ასევე ეხება სარედაქციო დამოუკიდებლობის საკითხებს. ეს კითხვები მნიშვნელოვანია და აუცილებელია, რომ ამ კითხვებზე მათ და საზოგადოებას ნათელი და დროული პასუხები გაეცეს.კანონმდებლობის თანახმად, საზოგადოებრივი მაუწყებლის ცხოვრებაში ძალიან მნიშვნელოვანი როლი ბორდს და საქართველოს პარლამენტს აკისრია, რომელსაც აქვს უშუალო შესაძლებლობა და ვალდებულება, რომ საზოგადოებრივი მაუწყებლის საქმიანობას მუდმივ რეჟიმში ადევნოს თვალ-ყური, მოისმინოს ანგარიში და ა. შ“, - აღნიშნა ანა ნაცვლიშვილმა.

ანა ნაცვლიშვილის განცხადებით, პრეზიდენტსა და ადმინისტრაციას მუდმივი ყურადღების არეალში ექნება აღნიშნული საკითხი.

მაია ბითაძე - ევროპამ 50 წლით გაგვისწრო, მაგრამ ნაბიჯ-ნაბიჯ ჩვენც მივყვებით
ქართული პრესის მიმოხილვა 12.11.2019
ვახტანგ ძაბირაძე - ოპოზიციაში არ ჩანს ოპოზიციური ძალა, რომელიც ოპოზიციურად განწყობილი პოლიტიკური ძალებისა და ელექტორატის ლიდერი გახდებოდა
„სამ რაან სპა-ცენტრი“ ევროპის საუკეთესო სპად დასახელდა