ნატო-ს 11-მა წევრმა სამხედრო ხარჯების ბიუჯეტი მშპ-ს 2%-მდე გაზარდა

ნატო-ს 11-მა წევრმა სამხედრო ხარჯების ბიუჯეტი მშპ-ს 2%-მდე გაზარდა. ამის შესახებ ნატო-ს გენერალურმა მდივანმა იენს სტოლტენბერგმა განაცხადა.

„სიტუაცია ერთგვაროვანი არ არის, თუმცა გაცილებით უკეთესია, ვიდრე სამი წლის წინ იყო, როდესაც მშპ-ს 2%-ის კრიტერიუმი ნატო-ს მხოლოს სამ წევრ ქვეყანას ჰქონდა შესრულებული“, - განაცხადა ნატო-ს გენერალურმა მდივანმა.

იენს სტოლტენბერგის თქმით, ნატო-ს წევრი სახელმწიფოებისგან ძალიან რთულია პოლიტიკური მხარდაჭერის მიღება თავდაცვითი ხარჯების გაზრდასთან დაკავშირებით.

როგორც ნატო-ს გენერალურმა მდივანმა აღნიშნა, ნატო-ს ევროპული წევრების თავდაცვითი ხარჯები საშუალოდ მშპ-ს 1,5%-ს შეადგენს.

შეგახსენებთ, რომ 2014 წლის ნატო-ს სამიტზე მიღებული იყო გადაწყვეტილება იმის თაობაზე, რომ პერსპექტივაში ნატო-ს წევრი ქვეყნების თავდაცვით ხარჯებს მშპ-ს 2%-მდე გაზრდიან. აშშ-ს პრეზიდენტი დონალდ ტრამპი არაერთხელ მოუწოდებდა მოკავშირეებს მიღწეული შეთანხმების შესრულებისკენ. აშშ-ს პრეზიდენტი ასევე იმუქრებოდა, რომ სხვა შემთხვევაში აშშ შეამცირებდა ნატო-ს წევრი ქვეყნების უსაფრთხოების უზრუნველყოფის პროგრამებში მონაწილეობას.