ანა მიქელაძე - საოლქო-საარჩევნო კომისიაში სულ 307 საჩივარია შესული
საოლქო-საარჩევნო კომისიაში სულ შესულია 307 საჩივარი. საჩივრების უმეტესი ნაწილი არის პროცედურული ხარვეზების,- ამის შესახებ ცესკო-ში გამართულ საინფორმაციო ბრიფინგზე, ცესკოს პრესპიკერმა ანა მიქელაძემ განაცხადა.
ანა მიქელაძის თქმით, ყველა საჩივარი საოლქო-საარჩევნო კომისიების მიერ კანონით დადგენილი წესით და ვადებით განიხილება და შესაბამისი რეაგირება მოხდება.
„ასევე მინდა წარმოგიდგინოთ ინფორმაცია საოლქო-საარჩევნო კომისიებში შესული საჩივრების შესახებ. ამ დროისთვის, საოლქო-საარჩევნო კომისიაში სულ შესულია 307 საჩივარი და აღსანიშნავია, რომ შესული საჩივრების უმეტესობა დღის განმავლობაში ასევე იწერებოდა საუბნო-საარჩევნო კომისიებში. საჩივრების უმეტესი ნაწილი არის პროცედურული ხარვეზების. ძირითადი მოთხოვნა კომისიის წევრებისთვის დისციპლინური პასუხისმგებლობის ზომის დაკისრებაა, თუმცა საოლქო-საარჩევნო კომისიებში სხვა მოთხოვნის შემცველი საჩივრებიც იყო შესული. არის ერთეული საჩივრები, რომლებიც უკავშირდება უბნის შედეგებს. ყველა საჩივარი, რა თქმა უნდა, საოლქო-საარჩევნო კომისიების მიერ კანონით დადგენილი წესით და ვადებით იქნება განხილული და მოხდება შესაბამისი რეაგირება“,-განაცხადა მიქელაძემ.
