თელავში ინაუგურაციის გენერალური რეპეტიციისთვის ემზადებიან. როგორც "ინტერპრესნიუსს" თელავის ისტორიული მუზეუმის დირექტორმა განუცხადა, სამუშაო ჯგუფი სცენისთვის შესაბამის კონსტრუქციას და აპარატურას ამონტაჟებს, რათა ხვალ დილიდან გენერალური რეპეტიციის გავლაა დაგეგმილი.
"სამუშაო ჯგუფმა ძირითადი საქმე ფაქტობრივად დაასრულა. ერეკლე მეფის სასახლე და მიმდებარე ტერიტორია უკვე დასუფთავდა. ამ ეტაპზე აპარატურას ამონტაჟებენ, რათა ხვალ გენერალური რეპეტიციაა დაგეგმილი. დღეს საორგანიზაციო ჯგუფის წევრებს ველოდებით," - განაცხადა თელავის ისტორიული მუზეუმის დირექტორმა გურამ ურჩუხიშვილმა.
ქალაქის ქუჩებში გამოფენილია სახელმწიფო დროშები. პროცესში აქტიურადაა ჩართული მერიის შესაბამისი სამსახურები.
თელავში, სალომე ზურაბიშვილის ინაუგურაცია 16 დეკემბერს, 15:00 საათზე დაიწყება და 40 წუთს გასტანს. მოსახლეობას საშუალება ექნება ინაუგურაციას თვალი თელავის ვაჟა- ფშაველას სახელობის თეატრის წინ დამონტაჟებულ მონიტორზე ადევნოს.