რაც დღეს თქვით, არის ჰაერის რხევა, - ამ სიტყვებით მიმართა პარლამენტის ფრაქცია „ნაციონალური მოძრაობის“ წევრმა, სალომე სამადაშვილმა შს მინისტრ გიორგი გახარიას.

მისივე თქმით, ძალიან მოსაწყენი საყურებელი იყო სპექტაკლი, რომელიც გიორგი გახარიამ უმრავლესობასთან ერთად დადგა.

„ძალიან ეცადეთ, დიდხანს პასუხობდით შეკითხვებს, ინტელექტუალური უპირატესობის მოპოვების მცდელობაც გქონდათ ოპოზიციაზე, მაგრამ შემდეგ ერთი ფრაზით გაყიდეთ საკუთარი პოლიტიკური არსი და პოლიტიკური გუნდის მსოფლმხედველობა - ჩავაგდეთ კირკიტაძე და სხვებსაც ჩავაგდებთო. ყველაფერი, რაც მანამდე თქვით, არის ჰაერის რხევა და რასაც ახლა იტყვით, ისიც ასეთივე ფუჭი ჰაერის რხევაა, რადგან ამაში აისახება ბიძინა ივანიშვილის პოლიტიკური არსი. როგორც საათი დღეში ერთხელ აჩვენებს ნამდვილ დროს, სწორედ ასე, დღეში ერთხელ, ამ ერთ ფრაზაში ქართულ საზოგადოებას უთხარით სიმართლე“, - მიმართა გიორგი გახარიას სალომე სამადაშვილმა.