რუსეთის პრეზიდენტის ვლადიმერ პუტინის განცხადებით, თუკი სირიიდან ჯარების გაყვანის შესახებ ამერიკის შეერთებული შტატების ნაბიჯი რეალიზებული იქნება, ეს იქ ვითარების სტაბილიზებას შეუწყობს ხელს. „რია ნოვოსტის“ ინფორმაციით, კრემლის ლიდერმა ეს განცხადება თურქეთის პრეზიდენტთან რეჯებ თაიფ ერდოღანთან პირისპირ შეხვედრის შემდეგ გამართულ პრესკონფერენციაზე გააკეთა.
პუტინის განცხადებით, ამერიკელები სირიაში უკანონოდ არიან, რადგან ისინი არც დამასკოს მოუწვევია, არც გაეროს გადაწყვეტილებით იმყოფებიან. „დღევანდელ შეხვედრაზე საუბარი შეეხო იმასაც, თუ რა გავლენას მოახდენს სირიაში ვითარების შემდგომ განვითარებაზე ამერიკის ხელისუფლების გადაწყვეტილება საკუთარი ქვეყნის ჯარის სირიის ჩრდილო-აღმოსავლეთ რაიონიდან გაყვანის შესახებ. თუკი ასეთი გეგმები რეალურად განხორციელდება, ეს იქნება პოზიტიური ნაბიჯი, რომელიც ხელს შეუწყობს მდგომარეობის სტაბილიზებას სირიის სახელმწიფოს ამ არამშვიდ რაიონში, რომელიც ამჟამად ქურთული ფორმირებების კონტროლშია“, - განაცხადა პუტინმა.