როდესაც ქალაქში გვაქვს ამდენი პრობლემა სხვადასხვა მიმართულებით, რატომ არ გაიზარდა არც ერთი თეთრით გამწვანების დაფინანსება, ჯანდაცვის დაფინანსება, ეკონომიკის ხელშეწყობის დაფინანსება, თუ ბიუჯეტში ნაშთი არსებობს?! - ამ შეკითხვით თბილისის საკრებულოს სხდომაზე საკრებულოს დეპუტატმა, "ნაციონალური მოძრაობის" წევრმა ირაკლი ნადირაძემ მერიის საფინანსო საქალაქო სამსახურის უფროსს გაიოზ თალაკვაძეს მიმართა.
"როგორც ჩანს, დასასვენებლად იყვნენ მერიაში წასულები - ზოგი გუდაურში, ზოგი ბაკურიანში და ზოგი შვეიცარიაში და უბრალოდ დაგეზარათ, რომ ეს რესურსის ნაშთი და 72 მილიონი ლარი არ არის პატარა თანხა, რაციონალურად რომ გადაგენაწილებინათ იმ საჭიროებებისთვის, რომელიც ქალაქში გვაქვს. როდესაც ქალაქში გაქვს ამდენი პრობლემა სხვადასხვა მიმართულებით, რატომ არ გაიზარდა არც ერთი თეთრით გამწვანების დაფინანსება, ჯანდაცვის დაფინანსება, ეკონომიკის ხელშეწყობის დაფინანსება და ასე შემდეგ?! წლიდან წლამდე ჩვენ სწორედ უსახსრობის გამო უამრავ ადამიანს ვეუბნებით უარს თუნდაც 50-ლარიან დაფინანსებაზე, ეს ხომ არ იყო რაღაც მიზნობრივი ტრანსფერი, რომელსაც ვერ შეეხებოდი და ვერ გადაამისამართებდი? ეს იყო ნაშთი, რომლის გადანაწილება თქვენ შეგეძლოთ. რა იყო ამის მიზეზი? ახალი წლების გამო თუ ისვენებდით და ამიტომ არ მოხმარდა არც ერთი თეთრი თუნდაც ჯანდაცვას ან სოციალურ საკითხებს?", - განაცხადა ნადირაძემ.