განათლების სამინისტრო სამეგრელოს რეგიონში 20-ზე მეტ საჯარო სკოლაში სხვადასხვა ინფრასტრუქტურულ სამუშაოს განახორციელებს
სამეგრელოს რეგიონში, განათლების, მეცნიერების, კულტურისა და სპორტის სამინისტრო მუნიციპალური განვითარების ფონდთან ერათად, 20-ზე მეტ საჯარო სკოლაში სხვადასხვა ინფრასტრუქტურულ სამუშაოს განახორციელებს.
როგორც „ინტერპრესნიუსს“ განათლების, მეცნიერების, კულტურისა და სპორტის სამინისტროს სტრატეგიული კომუნიკაციის დეპარტამენტიდან აცნობეს, პროექტი მოიცავს როგორც სამშენებლო, ისე გამაგრებით და სარეაბილიტაციო სამუშაოებს.
მათივე ინფორმაციით, პროექტების ნაწილი პროცესშია, ნაწილი უახლოეს პერიოდში დაიწყება. მიმდინარე და დაგეგმილი სამუშაოები მინისტრის მოადგილემ, ნათია ზედგინიძემ ადგილობრივი თვითმმართველობის წარმომადგენლებთან ერთად, წალენჯიხის, ზუგდიდის, მარტვილის, აბაშის, ხობის მუნიციპალიტეტებში შემავალ სოფლებში დაათვალიერა.
ნათია ზედგინიძე სამეგრელოს რეგიონში რამდენიმე საგანმანათლებლო რესურს-ცენტრსაც ეწვია და რამდენიმე სოფლის მოსახლეობას შეხვდა.
მინისტრის მოადგილემ მოსახლეობას სოფლის მხარდაჭერის პროგრამის ფარგლებში განსახორციელებელ პროექტებზე მიაწოდა ინფორმაცია.
