გიორგი გახარია - თბილისში უკვე აბსოლუტურად გამიჯნულია საგამოძიებო, საუბნო და ოპერატიული მიმართულებით დაყოფა

თბილისში უკვე აბსოლუტურად გამიჯნულია დაყოფა საგამოძიებო, საუბნო და ოპერატიული მიმართულებით, - ამის შესახებ შს მინისტრმა გიორგი გახარიამ პარლამენტში, „მინისტრის საათის“ ფარგლებში გამოსვლისას განაცხადა.

შინაგან საქმეთა მინისტრმა გამოსვლის პირველი ნაწილი, სამინისტროში მიმდინარე რეფორმებს დაუთმო. გიორგი გახარიამ კრიმინალური პოლიციის და საგამოძიებო მიმართულების გაძლიერებაზე ისაუბრა.

„სისტემური რეფორმების გეგმა შეიცავს 3 კომპონენტს, ეს არის შინაარსობრივი, სტრუქტურული და საკანონმდებლო ცვლილებები და ახლა მე კონკრეტულად გადავალ იმ ცვლილებებზე, რომელიც უკვე განხორციელდა იმ მიმართულებების ნაწილში, რომელიც არის ძირითადი დეპარტამენტები და ძირითადი პასუხისმგებლობის ზონები შინაგან საქმეთა სამინისტროსთვის. კრიმინალური პოლიციის ნაწილში, არ ვილაპარაკებ ბევრს იმაზე, რაზეც უკვე გვისაუბრია. კრიმინალური პოლიციის ნაწილში რეფორმები ძირითადად შეიცავდა სპეციალიზაციის გაჩენას და ეს პროცესი უკვე დაწყებულია თბილისში. თბილისში არსებობს უკვე აბსოლუტურად გამიჯნული დაყოფა საგამოძიებო, საუბნო და ოპერატიული მიმართულებით. თბილისი არის პირველი ქალაქი, სადაც გამოჩნდნენ მართლწესრიგის ოფიცრები, ეს არის ის საუბნო მიმართულება, რომელიც არის ძირითადად მიმართული პრევენციაზე. ვაკე-საბურთალოს რაიონში უკვე მოქმედებს ასეთი ქვედანაყოფი და გარდა იმისა, რომ ამ ახალ ქვედანაყოფს - ახალგაზრდებს, რომლებიც მსახურობენ პოლიციაში, უკვე თამამად უღებს თითოეული ჩვენი მოქალაქე თავისი სახლის კარს და შედიან მათთან ძალზედ ეფექტურ კომუნიკაციაში. ისინი ასევე, თავისი პასუხისმგებლობის ზონაში, აკონტროლებენ და თვალყურს ადევნებენ სოციალური ცხოვრების ყველაზე მნიშვნელოვან კომპონენტებს, როგორიცაა სასწავლო, საგანმანათლებლო და კიდევ ბევრი დანიშნულების კომპონენტი. ამ დრომდე უკვე ტესტირება გაიარა 1200-მა გამომძიებელმა, გაზომილი იყო მათი ცოდნის და კომპეტენციის დონე.

ამ გაზომვების შედეგად, შეიქმნა აკადემიაში გამომძიებლების სრულიად ახალი გადამზადების კურსი. შესაბამისად, დღეის მდგომარეობით 100-ზე მეტი გამომძიებელი ამ კურსს გადის. ყველაზე მნიშვნელოვანი, რაც გაკეთდა ამ კომპონენტში - პირველად შინაგან საქმეთა სამინისტროში დაინერგა ანაზღაურებადი სტაჟირება, რაც ნიშნავს იმას, რომ ახალგაზრდები, რომლებიც იწყებენ მუშაობას, თან სწავლას, მაგალითად პოლიციის აკადემიაში, მათ უკვე ანაზღაურება ენიშნებათ. ეს უკვე გვაძლევს საშუალებას საუკეთესო კადრები მოვიზიდოთ შინაგან საქმეთა სამინისტროს რიგებში.

ის, რაც ჩვენ თავიდანვე განვაცხადეთ და დავარქვით საგამოძიებო კომპონენტის გაძლიერება, რომელიც შედგება 3 ძირითადი მიმართულებისგან, ეს გახლავთ შიდა გამიჯვნა და ამაზე უკვე ვისაუბრე, რაც ხდება კრიმინალურ პოლიციაში. ასევე, საკანონმდებლო გამიჯვნა. მოგეხსენებათ, რომ ჩვენი კანონმდებლობის გათვალისწინებით, შინაგან საქმეთა სამინისტროს ინიციატივის შედეგად იყო ინიცირებული საგამოძიებო კომპონენტის გამიჯვნა შინაგან საქმეთა სამინისტროს გამომძიებელსა და პროკურორის საზედამხედველო უფლებამოსილებებს შორის, ამაში დეპუტატებიც ძალიან დაგვეხმარნენ - ეს კონცეფცია ჩვენ წარუდგინეთ ვენეციის კომისიას. ეს კონცეფცია ვენეციის კომისიამ მოიწონა, დაგვეთანხმა და დღეის მდგომარეობით ჩვენ ვაკეთებთ გეგმას, რომლის განხორციელების აბსოლუტურად მკაფიოდ გაწერილი 2-წლიანი გეგმა უკვე არსებობს და რომელსაც თქვენთან მოვიტანთ განსახილველად. კიდევ ერთი, მესამე, საგამოძიებო ნაწილში ძალზედ მნიშვნელოვანი, უკვე შეიქმნა ახალი ფუნქცია შინაგან საქმეთა სამინისტროში, ეს გახლავთ ხარისხის კონტროლი, რომელიც შეთავსებით დაევალა ადამიანის უფლების დაცვის დეპარტამენტს, რომელმაც საკმაოდ წარმატებით იფუნქციონირა ამ ერთი წლის განმავლობაში და იმ მუხლებით, პირველ რიგში რომლებიც ეხება მძიმე დანაშაულს, რა თქმა უნდა, დაექვემდებარება პირველ რიგში ამ დეპარტამენტის მიერ განხორციელებად ხარისხის კონტროლს“, - განაცხადა გიორგი გახარიამ.

ზაალ ანჯაფარიძე - შაქარაშვილის საქმესთან დაკავშირებით კითხვები უფრო მეტია, ვიდრე პასუხები, რაც გამოწვეულია რამდენიმე გარემოებით
ქართული პრესის მიმოხილვა 06.07.2020
ვიქტორ ყიფიანი - შავი ზღვის რეგიონისადმი დასავლეთის მიდგომა ოპერატიულად გადახედვასა და მისადაგებას საჭიროებს
ყაზახეთის რესპუბლიკის ელჩი საქართველოში - ყაზახეთის მიღწევა: პირველი პრეზიდენტის ნ. ნაზარბაევის როლზე (R)
თიბისი იპოთეკური სესხების სუბსიდირების სახელმწიფო პროგრამაში ერთვება
როგორ ვლინდება ლაქტოზის აუტანლობა და რით შეგვიძლია ჩავანაცვლოთ ცხოველური რძე ბავშვთა კვებაში?
მაკა ასათიანი განცხადებას ავრცელებს
„მზადება ზაფხულისთვის“  (R)
"პროკრედიტ ბანკმა" საკუთარი მზის ელექტროსადგური წარადგინა