მამუკა ბახტაძე - ჩვენ შევქმნით ახალ ახალგაზრდულ პლატფორმას, რომელიც საშუალებას მოგვცემს, ახალგაზრდული ფესტივალები საქართველოს ყველა კუთხეში ჩავატაროთ

ჩვენ უახლოეს მომავალში შევქმნით ახალ ახალგაზრდულ პლატფორმას, რომელიც საშუალებას მოგვცემს, ახალგაზრდული ფესტივალები საქართველოს ყველა კუთხეში ჩავატაროთ, - ამის შესახებ საქართველოს პრემიერ-მინისტრმა მამუკა ბახტაძემ სტუდენტურ ფესტივალზე სიტყვით გამოსვლისას განაცხადა. როგორც „ინტერპრესნიუსს“ პრემიერ-მინისტრის პრესსამსახურიდან აცნობეს, მთავრობის მეთაურმა ყურადღება გაამახვილა განათლებასა და ახალგაზრდობაზე, როგორც ეროვნულ იდეაზე. მამუკა ბახტაძემ აღნიშნა, რომ საქართველოში სტუდენტობა ყოველთვის განსაკუთრებულ როლს თამაშობდა და სწორედ ისინი არიან სახელმწიფოს მამოძრავებელი ძალა. „ჩემთვის, როგორც რიგითი მოქალაქისთვის, მთავარია, ნებისმიერი ხელისუფლებისთვის ამოსავალი წერტილი იყოს არსებული რესურსი ჩადოს არა მომავალ არჩევნებში, არამედ ქვეყნის მომავალში. ერთადერთი გარანტი, რომ ეს ასე იქნება, არის ჩვენი ეროვნული იდეა - რომ ბიუჯეტის მეოთხედი ყოველთვის უნდა იყოს მიმართული განათლებაზე, ახალგაზრდებზე, ჩვენი ქვეყნის მომავალზე. თითოეულმა ჩვენგანმა მხარი უნდა დავუჭიროთ ამ დიდ იდეას. ჩემთვის განსაკუთრებით საამაყოა, როდესაც ყოველდღე ვკითხულობ ჩვენი ახალგაზრდების წარმატებას. თქვენ ხართ ჩვენი ქვეყნის მომავალი და პერსპექტივა. თქვენ ხართ ყველაზე ენერგიული, აქტიური, შემოქმედებითად მოაზროვნე და უკომპრომისო ადამიანები, როდესაც ვსაუბრობთ ჩვენი ქვეყნის ეროვნული ინტერესების დაცვაზე“, - მიმართა პრემიერ-მინისტრმა ახალგაზრდებს და სტუდენტური ფესტივალის ორგანიზატორებსა და თბილისის მერიას მადლობა გადაუხადა.

ფესტივალის მონაწილეებს ასევე სიტყვით მიმართა თბილისის მერმა კახა კალაძემ. ფესტივალისთვის ოლიმპიური პარკის მიმდებარე ტერიტორიაზე სტუდენტური ქალაქი მოეწყო, სადაც 10 დღის განმავლობაში სპორტული და კულტურულ-შემოქმედებითი აქტივობები ჩატარდება. ფესტივალში თბილისსა და საუნივერსიტეტო ქალაქებში მოქმედი 36 უმაღლესი საგანმანათლებლო დაწესებულებაა ჩართული. ფესტივალის გახსნას სხვადასხვა უმაღლესი საგანმანათლებლო დაწესებულების 10 ათასამდე სტუდენტი დაესწრო.

სტეპან გრიგორიანი - ფაშინიანმა არჩევნები იმის გამო მოიგო, რომ სომეხმა ხალხმა ყარაბაღის ომში დამარცხება მას არ დაუკავშირა
ქართული პრესის მიმოხილვა 21.06.2021
ალექსანდრე თვალჭრელიძე - თუ დაინიშნა რიგგარეშე საპარლამენტო არჩევნები, რისი ალბათობა რეალურია, 2024 წლის საპარლამენტო არჩევნების შედეგად ვერც ერთი პარტია გადამწყვეტ უმრავლესობას ვერ მოიპოვებს
"თბილისის ბალნეოლოგიურ კურორტში“ კონფერენცია „კურორტოლოგიის როლი მედიცინაში“ გაიმართა
ტერაბანკმა FMO-სგან გრძელვადიანი დაფინანსება მიიღო
20 ივნისის მოვლენებთან დაკავშირებით, კახა ოქრიაშვილი სპეციალურ განცხადებას ავრცელებს