თბილისის მერიის ინფორმაციით, ოპერისა და ბალეტის სახელმწიფო თეატრის ბაღში დაზიანებული ბალერინების ქანდაკებები, რეაბილიტაციის მიზნით, „ეკოსერვის ჯგუფმა“ საცავში უკვე გადაიტანა. ამასთან დაკავშირებით დედაქალაქის მერია განცხადებას ავრცელებს.

მერია მოსახლეობას კულტურული მემკვიდრეობისა და დედაქალაქის ინფრასტრუქტურის გაფრთხილებისკენ მოუწოდებს.

„გვინდა, გამოვეხმაუროთ თბილისის ოპერისა და ბალეტის სახელმწიფო თეატრის ბაღში არსებული შადრევნის დაზიანების ფაქტს. სამწუხაროდ, ადგილი ჰქონდა ბალერინების ქანდაკებების დაზიანებას.

განზრახ დაზიანების ფაქტზე შინაგან საქმეთა სამინისტრომ გამოძიება საქართველოს სსკ-ის 187-ე მუხლით დაიწყო, რაც ნივთის დაზიანებას ან განადგურებას გულისხმობს.

თბილისის მერიის “ეკოსერვის ჯგუფმა” ქანდაკებები საცავში გადაიტანა, მათი შემდგომი რეაბილიტაციის მიზნით. უახლოეს მომავალში მოხდება შადრევნის სრული რეაბილიტაცია და ქანდაკებები ბაღს დაუბრუნდება.

მოვუწოდებთ მოსახლეობას, გაუფრთხილდნენ თბილისს, მის კულტურულ მემკვიდრეობას და დედაქალაქის ინფრასტრუქტურას“, - ნათქვამია თბილისის მერიის მიერ გავრცელებულ განცხადებაში.