მარიამ კუბლაშვილის განცხადებით, მალხაზ მაჩალიკაშვილის მოსამართლის წინაშე დაკითხვას ვერ მოითხოვს, რადგან კანონი ამის შესაძლებლობას არ აძლევს

მალხაზ მაჩალიკაშვილის ადვოკატის მარიამ კუბლაშვილის განმარტებით, ის მისი დაცვის ქვეშ მყოფი პირის მაგისტრატი მოსამართლის წინაშე დაკითხვას ვერ მოითხოვს, რადგან კანონი ამის შესაძლებლობას არ აძლევს.

“მოწმის დაკითხვის წესთან დაკავშირებით “სისხლის სამართლის საპროცესო კოდექსის“ 114-ე მუხლი მოქმედებს, სადაც წერია, რომ დაცვის მხარეს და ბრალდების მხარეს აქვთ უფლება, მოითხოვონ მოწმის დაკითხვა მაგისტრატი მოსამართლის წინაშე. ჩამოწერილია საფუძვლები, თუ რა შემთხვევაში შეიძლება მოხდეს ეს. ამასთან, ამ წესზე ძველი კოდექსი მოქმედებს, რის თაობაზეც საკონსტიტუციო სასამართლომ უკვე იმსჯელა და თქვა, რომ მუხლი ხარვეზიანია, რადგან მხოლოდ პროკურორსა და გამომძიებელს შეუძლიათ, რომ მოწმის დაკითხვა სასამართლოს წესით მოითხოვონ. დაცვის მხარეს ამის უფლება არ ჰქონდა. ეს ჩანაწერი შეიცვალა, მაგრამ აქ წერია - დაცვის მხარე და ბრალდების მხარე. მალხაზ მაჩალიკაშვილი დაბარებულია მოწმის სახით. ის მხარე არ არის. მის მიმართ ჯერ სისხლის სამარლებრივი დევნა არ ხორციელდება და ბრალი წაყენებული არა აქვს. რა თქმა უნდა, საქმე არ არის გადასული სასამართლოში. მხარედ ის ბრალის წაყენების შემთხვევაში იქნება მოხსენიებული. შესაბამისად, ჩვენ ეს უფლებამოსილება არ გაგვაჩნია. კანონი ამის საშუალებას არ გვაძლევს. როგორც კი მალხაზი გამოკითხვაზე დაიბარეს, აღნიშნულ საკითხზე მაშინვე ვიფიქრე, რადგან თავს ავარიდებდი მის ემოციურობას, სუს-ის შენობაში შესვლისგან გამოწვეულ სტრესს, არარელევანტურ კითხვებს. მოსამართლესთან ყველაფერი გამჭვირვალე იქნებოდა, მაგრამ სამწუხაროდ, კანონი ამის საშუალებას არ მაძლევს. ბევრ რაღაცაში ვართ შეზღუდული, მაგრამ არსებობს კანონი, რომელსაც უნდა დავემორჩილოთ“, - განუცხადა “ინტერპრესნიუსს“ მარიამ კუბლაშვილმა.

ამასთან, კუბლაშვილმა ისიც აღნიშნა, რომ თუკი მალხაზ მაჩალიკაშვილისთვის ბრალის წაყენება ტერორიზმთან დაკავშირებული მუხლით მოხდება, ასეთ შემთხვევაშიც კანონი პირის სასამართლოს წინაშე გამოკითხვას გამორიცხავს.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს