ნოდარ ხადური OECD-ის ექსპერტებს შეხვდა
საქართველოს კონკურენციის სააგენტოს თავმჯდომარე, ნოდარ ხადური ეკონომიკური თანამშრომლობისა და განვითარების ორგანიზაციის (OECD) კონკურენციის განყოფილების უფროს ექსპერტს - საბინა ზიგელსკის და კერძო ექსპერტს - მაქსიმ ნაზარენკოს შეხვდა.
როგორც „ინტერპრესნიუსს“ კონკურენციის სააგენტოდან აცნობეს, შეხვედრაზე მხარეებმა იმსჯელეს კონკურენციის კანონმდებლობის ევროკავშირის კონკურენციის სამართალთან დაახლოების მიზნით განსახორციელებელი საკანონმდებლო ცვლილებების აუცილებლობასა და საქართველოს კონკურენციის სააგენტოს გაძლიერებისკენ მიმართულ სამომავლო ღონისძიებებზე.
მათივე ინფორმაციით, ექსპერტების ძირითადი ინტერესის საგანს წარმოადგენდა საქართველოს კონკურენციის სააგენტოს წინაშე აღსრულების პროცესში მდგარი გამოწვევები და არსებული პრობლემების გადაჭრის მიზნით დაგეგმილი აქტივობები.
ნოდარ ხადურმა ექსპერტებს მიაწოდა ინფორმაცია დღეს მოქმედი საკანონმდებლო ჩარჩოს და შემუშავებული საკანონმდებლო ცვლილებების, საქართველოში კონკურენციის სამართლის აღსრულების და სააგენტოს მიერ განხორციელებული ქმედებების შესახებ. შეხვედრას ესწრებოდნენ: ევროკავშირის პროექტის „საქართველოს კონკურენციის სააგენტოს მხარდაჭერა“ გუნდის ხელმძღვანელი, აურელიო ლა ტორე და კონკურენციის სააგენტოს თანამშრომლები.
ექსპერტებმა გამოხატეს მხარდაჭერა სააგენტოს გაძლიერების და ეფექტიანობის გაზრდის მიზნით განსახორციელებელი ღონისძიებების მიმართ და გამოთქვეს მზადყოფნა სამომავლო თანამშრომლობისათვის.
