დავით გარეჯის საკითხზე, პრეზიდენტის მხრიდან კიდევ უფრო მეტი ინფორმაციაა საჭირო, - ამის შესახებ ჟურნალისტებს დეპუტატმა ეკა ბესელიამ განუცხადა.

ეკა ბესელიას განცხადებით, ასევე მნიშვნელოვანია პარლამენტის წინაშე წარსდგნენ მთავრობის წარმომადგენლებიც და საზოგადოებას მიაწოდონ ინფორმაცია, მოლაპარაკებების საკითხთან დაკავშირებით. ეკა ბესელიას განცხადებით, აღმასრულებელმა ხელისუფლებამ პატივი უნდა სცეს კონსტიტუციას და შეასრულოს ნაკისრი ვალდებულება, რაც კანონმდებლების მიმართ, როგორც მაკონტროლებლის, დამოკიდებულებაში უნდა გამოიხატოს.

„მე მგონია, რომ პრეზიდენტის მხრიდან კიდევ უფრო მეტი ინფორმაციაა საჭირო. ეს საკითხი რა ფორმით და როგორ დაისვა, იმიტომ, რომ ეს გუშინ დაწყებული თემა არ არის. ეს არის თემა, რომელიც მიძინებული იყო, შემდეგ ცოცხლდებოდა, მაგრამ ყოველთვის მტკივნეული იყო. ამიტომ, ძალიან დიდი სიფრთხილეა საჭირო, როდესაც ასეთ თემაზე უმაღლესი პოლიტიკური თანამდებობის პირები საუბრობენ ან მოქმედებენ. ამიტომ, რამ შეუწყო ამან ხელი, ეს საკითხი ცოტა უფრო სიღრმისეულადაა გასაანალიზებელი და პარლამენტმა ეს ინფორმაცია უნდა მიიღოს“, - განაცხადა ეკა ბესელიამ.