ევროკომისიამ ყოველწლიური მოხსენება ევროკავშირის გაფართოებისა და კანდიდატ სახელმწიფოებთან მოლაპარაკებების მდგომარეობის შესახებ გამოაქვეყნა. თურქეთის თაობაზე მოხსენებაში ნათქვამია, რომ ეს ქვეყანა რჩება ევროკავშირის საკვანძო პარტნიორად და კანდიდატ სახელმწიფოდ. მიმდინარეობს დიალოგი და თანამშრომლობა უმაღლეს დონეზე იმ საკითხების გარშემო, რაც ორივე მხარისთვის საინტერესოა. მათ შორის უმთავრესია მიგრაციის საკითხები და თურქეთში მყოფი ლტოლვილების დახმარება ევროკავშირის მხრიდან. თუმცა, თურქეთი სულ უფრო შორდება ევროკავშირს. ამ ქვეყანამ სერიოზულად დათმო პოზიციები კანონის უზენაესობისა და ძირითადი უფლებების საკითხში. მოხსენების თანახმად, საკონსტიტუციო შესწორების შედეგად სერიოზულად შესუსტდა პოლიტიკურ სისტემაში ბალანსისა და ურთიერთკონტროლის ეფექტური სისტემა. შედეგად დანარჩენი საკითხების განხილვა აზრს კარგავს და მოლაპარაკებები ფაქტობრივად ჩიხშია შესული. თურქეთი ევროკავშირის წევრობის კანდიდატად მხოლოდ ფორმალურად რჩება.