გიორგი სამუშია ის ადამიანია, რომელმაც მიხეილ სააკაშვილის ემიგრანტებთან შეხვედრისას განსხვავებული აზრის მქონე ადამიანებს წიწაკის „სპრეი“ შეასხა. გიორგი სამუშია, წინა ხელისუფლების ჯალათი და ეჭვმიტანილია წამებაზე, - ამის შესახებ ჟურნალისტებს უმრავლესობის დეპუტატმა მიხეილ ყაველაშვილმა განუცხადა.

მისივე თქმით, გიორგი სამუშიას მსგავსი ადამიანები აუცილებად დაისჯებიან.

„გიორგი სამუშია, ე.წ. წინა ხელისუფლების ჯალათი პირდაპირ შემიძლია ვთქვა, ეჭვმიტანილი წამებაზე დაკავებულია უკრაინაში. ეს ის ადამიანია, რომელიც სულ ახლახანს მიხეილ სააკაშვილი როცა ხვდებოდა ემიგრანტებს, იკადრა და იქ განსხვავებული აზრის მქონე ადამიანებს წიწაკის „სპრეი“ შეასხა. ეს ადამიანი არის მწამებელი. ეს ადამიანი იმართება ყოფილი პრეზიდენტისგან, რომელიც შოუებს დგამს ყოველთვის. გიორგი სამუშია და ასეთი ადამიანები, რომლებმაც უამრავი დანაშაული ჩაიდინეს ჩვენი მოქალაქეების წინაშე, აუცილებლად იქნებიან დასჯილები“, - განაცხადა მიხეილ ყაველაშვილმა.

აღნიშნულ კომენტარს პარლამენტი ავრცელებს.