ჩვენი მხარდაჭერა განაპირობა ორმა ძირითადმა ფაქტორმა: სამთავრობო პროგრამამ და მთავრობის წევრობის კანდიდატების უნარმა, წარმატებით შეასრულონ სამთავრობო პროგრამით დასახული ამოცანები, - ამის შესახებ იურიდიულ საკითხთა კომიტეტის თავმჯდომარემ, ანრი ოხანაშვილმა პლენარულ სხდომაზე განაცხადა, სადაც მთავრობის განახლებული შემადგენლობისთვის ნდობის გამოცხადების საკითხი განიხილება.
მისივე თქმით, სამთავრობო პროგრამა დაფუძნებულია ოთხ ძირითად პრინციპზე: დემოკრატიული სახელმწიფოს მშენებლობა; ქვეყნის ეკონომიკური განვითარება; ტერიტორიული მთლიანობისა და ქვეყნის დეოკუპაციისათვის ქმედითი ნაბიჯების გადადგმა და საქართველოს ევროპულ და ევროატლანტიკურ სივრცეში სრულფასოვანი ინტეგრაცია.
მთავრობის წევრობის კანდიდატებზე საუბრისას, ანრი ოხანაშვილმა აღნიშნა, რომ წარმოდგენილი კანდიდატების პროფესიული გამოცდილება, მათ მიერ შესაბამის უწყებებში აქამდე განხორციელებული საქმიანობა თუ გატარებული რეფორმები, ასევე მათი ხედვები და მოტივაცია საპარლამენტო უმრავლესობისთვის დამაჯერებელია, რომ ისინი შეძლებენ მათზე დაკისრებული მოვალეობების ზედმიწევნით შესრულებას.