საქართველოს ეკონომიკისა და მდგრადი განვითარების მინისტრის მოადგილე ნიკოლოზ ალავიძემ კომპანია „ჯორჯიან მანგანეზის“ მიერ ბოლო თვეებში განხორციელებული სამუშაოები და პროექტები დაათვალიერა. ეკონომიკისა და მდგრადი განვითარების სამინისტროს ინფორმაციით, ის კომპანიის მიერ წარმოდგენილ ანგარიშს მთავრობის სხვა წევრებთან ერთად გაეცნო.

მათივე ცნობით, ჭიათურაში, ლევან დავითაშვილთან, სოზარ სუბართან, ნიკოლოზ ალავიძესთან და იმერეთის სახელმწიფო რწმუნებულ ზვიად შალამბერიძესთან ერთად, ასევე იმყოფებოდნენ ეკონომიკის სამინისტროს ტექნიკური და სამშენებლო ზედამხედველობის სააგენტოს ხელმძღვანელი დავით გიგინეიშვილი და წიაღის ეროვნული სააგენტოს უფროსი მაია ზავრაშვილი.

აღსანიშნავია, რომ ამ სამუშაოების და პროექტების შესრულების ვალდებულება კომპანიამ მაისში აიღო, როცა მთავრობის მონაწილეობით კომპანიასა და დასაქმებულებს შორის მედიაციის პროცესი შედგა.

„ჩვენ დღეს აქ ვართ, რომ შევამოწმოთ კომპანიის მიერ აღებული ვალდებულებების შესრულების პროცესი, რომელიც იყო გაწერილი კონკრეტულ ვადებში, კონკრეტული გეგმით. ჯერჯერობით რაც შევამოწმეთ, ყველაფერი გაკეთებულია და იმაზე მეტიც, რისი მოლოდინიც გვქონდა. საკმაოდ დადებითი პროცესია და კიდევ ერთხელ ხაზს უსვამს კომპანია „ჯორჯიან მანგანეზის“ მხრიდან უმაღლესი სტანდარტის დანერგვას კორპორატიულ-სოციალური პასუხისმგებლობის მიმართულებით, რის გამოც ყველა მოხარულები ვართ“, - აღნიშნა ეკონომიკის მინისტრის მოადგილემ.

კერძოდ, მთავრობის წევრებმა დაათვალიერეს „ნოფის“ ტერიტორიაზე, ახალი სარკინიგზო ხაზი, საწყობი, კომპანიის მიერ რეკულტივირებული ტერიტორიები, ასევე, ჭიათურის დასუფთავების პროექტის ფარგლებში მიმდინარე სამუშაოები და მანგანუმის მადნის გადამამუშავებელი ახალი ქარხანა.

მნიშვნელოვანია კომპანიის მიერ ბოლო 3 თვის განმავლობაში გატარებული სხვა სოციალური ხასიათის ღონისძიებები, მათ შორის დასაქმებულთათვის ხელფასების ზრდის მიმართულებით - „ჯორჯიან მანგანეზმა“ დასაქმებულების ხელფასი უკვე გაზარდა 25%-ით. ასევე შეიცვალა კვების კომპანია, რაციონთან დაკავშირებით მიმდინარეობს დასაქმებულთა აზრის მუდმივი მონიტორინგი. აღსანიშნავია, რომ კომპანიამ სამედიცინო სერვისების ხელმისაწვდომობის მიზნით, ჭიათურაში ახალი ამბულატორიის მშენებლობა დაიწყო. კომპანიამ ასევე გაარემონტა # 1 საჯარო სკოლა და მონაწილეობა მიიღო რგანის სკოლის სარემონტო სამუშაოებში.

რაც შეეხება „ჯორჯიან მანგანეზის“ მიერ ჭიათურაში, გარემოსდაცვითი პოლიტიკის ფარგლებში, ბოლო 3 თვის განმავლობაში განხორციელებულ პროექტებს: ახლახანს დასრულდა ახალი სარკინიგზო ხაზის მშენებლობის პროექტი; კომპანიის მიერ აშენდა ორი პარალელური რკინიგზის ხაზიც, რათა მან შეუფერხებლად იმუშაოს; ჭიათურაში მოეწყო სარკინიგზო საწყობი, საავტომობილო სასწორი და ავტომობილებისთვის ერთი სამრეცხაო; აიგო ბეტონის მოედანი, ერთი საგუშაგო, ორი მესასწორის ოთახი და ლაბორატორია, ამჟამად მიმდინარეობს მუშაობა დამცავი კედლების ასაგებად; გადამზიდი ვაგონების დასატვირთად აშენდა რკინიგზის ბაქანი და სხვა.

აღსანიშნავია, რომ „ჯორჯიან მანგანეზმა“ ადგილობრივ მუნიციპალიტეტთან ერთად ჭიათურაში დასუფთავების პროექტი დაიწყო და ღონისძიებებს ყოველდღიურად ახორციელებს. 1 სექტემბრიდან კი ქალაქის ტერიტორიაზე, მძიმეწონიანი ავტომანქანების გადაადგილება შეიზღუდა. ამასთან, ყველა საკვანძო ტერიტორიაზე, სადაც მანგანუმის მადნით დატვირთული მძიმეწონიანი ავტომანქანები გადაადგილდება, 8 ავტოსამრეცხაო (ე.წ. კერხერები) მოეწყო. კომპანიამ ქუჩების მექანიკური დაგვისა და გადამრეცხი 8 სპეციალური ავტომანქანა შეიძინა - სპეცტექნიკა ჭიათურისა და ზესტაფონის ქუჩების ყოველდღიური დასუფთავებისთვის არის განკუთვნილი.

როგორც ნიკოლოზ ალავიძემ აღნიშნა, „ამ ყველაფერს აქვს მაგალითის სახე და სხვა მსხვილი კომპანიები გადაიღებენ მას და თვითონაც იგივე მაღალი სტანდარტით ეცდებიან, დანერგონ ეს პასუხისმგებლობა, რაც მთლიანობაში ძალიან წაადგება ქვეყნის ეკონომიკის განვითარებას“.