სამუშაო შეხვედრებში ყოველთვის მივიღებთ მონაწილეობას, თუმცა ის დიდი თემები, რაც არის პენსიების ნაწილი, მასწავლებელთა ხელფასების ნაწილი, არ გადაიხედება და არ გადავა ეს ფული სხვა მიმართულებებით, - ამის შესახებ საქართველოს ფინანსთა მინისტრის მოადგილემ, გიორგი კაკაურიძემ პარლამენტის ადამიანის უფლებათა დაცვისა და სამოქალაქო ინტეგრაციისა და იურიდიულ საკითხთა კომიტეტების ერთობლივი სხდომიდან გამოსვლის შემდეგ განაცხადა.
მან უპასუხა კითხვას აგრარულ საკითხთა კომიტეტის თავმჯდომარის, ოთარ დანელიას პოზიციის შესახებ, რომ სოფლის მეურნეობის სამინისტროს გაეზარდოს ბიუჯეტი.
"მე ვერ ვხედავ ბიუჯეტში ვერანაირ რესურსს ამისთვის. რა თქმა უნდა, კონკრეტული პროგრამის ფარგლებში შეიძლება მოხდეს რაღაც გადანაწილება, რომელიღაც პროგრამის გაიზარდოს რომელიღაც პროგრამის შემცირების ხარჯზე, თუმცა 100 და 200 მილიონით ეს გადანაწილება, რა თქმა უნდა, ვერ მოხდება", - აღნიშნა ფინანსთა მინისტრის მოადგილემ.
გიორგი კაკაურიძე ასევე გამოეხმაურა დანელიას განცხადებას უახლოეს დღეებში შესაძლო შეხვედრის შესახებ.
"ჩვენ, რა თქმა უნდა, მზად ვართ ყოველთვის. ჩვენ ბიუჯეტზე ვმუშაობთ უკვე, დიდი ხანია და ყოველთვის მზად ვართ კონსულტაციებისთვის. რა თქმა უნდა, სამუშაო შეხვედრებში ყოველთვის მივიღებთ მონაწილეობას, თუ ეს სურვილი იქნება. თუმცა ის დიდი თემები, რაც არის პენსიების ნაწილი, მასწაბლებელთა ხელფასების ნაწილი, არ გადაიხედება და არ გადავა ეს ფული სხვა მიმართულებებით", - განაცხადა კაკაურიძემ.