მარგო მარტიაშვილის გარდაცვალება ცხადყოფს ადმინისტრაციული სასაზღვრო ხაზის გასწვრივ არსებული გამშვები პუნქტების გახსნის აუცილებლობას, - ამის შესახებ ნათქვამია საქართველოში იტალიის ელჩის, ანტონიო ენრიკო ბარტოლის განცხადებაში.
როგორც ელჩის განცხადებაშია აღნიშნული, იტალია კიდევ ერთხელ ადასტურებს საქართველოს სუვერენიტეტისა და ტერიტორიული მთლიანობის მხარდაჭერას.
„იტალიის საელჩო უსამძიმრებს მარგო მარტიაშვილის ოჯახს. მარტიაშვილის გარდაცვალება კიდევ ერთი დასტურია იმისა, თუ რა უარყოფით გავლენას ახდენს ამჟამად არსებული შეზღუდვები ადმინისტრაციური საზღვრის ორივე მხარეს მცხოვრები ადამიანების კეთილდღეობაზე.
ეს სამწუხარო მოვლენა ცხადყოფს ადმინისტრაციული სასაზღვრო ხაზის გასწვრივ არსებული გამშვები პუნქტების გახსნის აუცილებლობას, რათა ადგილობრივ მოსახლეობას მიეცეს თავისუფლად გადაადგილების შესაძლებლობა, განსაკუთრებით - მაგრამ არამხოლოდ - გადაუდებელი სამედიცინო დახმარების მისაღებად. იტალია კიდევ ერთხელ ადასტურებს საქართველოს სუვერენიტეტისა და ტერიტორიული მთლიანობის მხარდაჭერას, ხაზს უსვამს ადამიანის ძირითადი უფლებების დაცვისა და კონსტრუქციულ დიალოგში ჩართვის აუცილებლობას, რომელიც სრულად გამოიყენებს ჟენევის საერთაშორისო მოლაპარაკებებით მიღწეულ ყველა ინსტრუმენტს, მათ შორის, ცხელ ხაზსა და ინციდენტების პრევენციისა და მათზე რეაგირების მექანიზმებს (IPRMS)”, - ნათქვამია საქართველოში იტალიის ელჩის ანტონიო ენრიკო ბარტოლის განცხადებაში.
არსებული ინფორმაციით, ახალგორის მკვიდრი, 70 წლის მარგო მარტიაშვილი რამდენიმე დღის წინ ცუდად გახდა. თუმცა საოკუპაციო რეჟიმის წარმომადგენლებმა მას თბილისში გადაყვანაზე უარი უთხრეს. მარტიაშვილი ცხინვალის საავადმყოფოში გარდაიცვალა.