საქართველოში ამ საქმის გამოძიების პოლიტიკური ნება არ არსებობს,- ამის შესახებ „ევროპული საქართველოს“ წევრმა სერგო რატიანმა ჟურნალისტებთან ია კერზაიას საქმესთან დაკავშირებით განაცხადა, რომლის შვილის, ბაჩანა შენგელიას საჩივარი დღეს სტრასბურგის სასამართლოში დარეგისტრირდა.
სერგო რატიანი ამბობს, რომ „ევროპული საქართველო“ ამ საქმის კომიტეტის ფარგლებში მოკვლევას ითხოვს.
„ზუგდიდის მე- 6 სკოლაში ტრაგედია დატრიალდა იმის საფუძველზე, რომ მოხდა ზეწოლა დირექტორზე და ეს ჩაიდინა მონიტორინგის სამსახურმა განათლების სამინისტროში, ინსპექტირების ჯგუფმა, ადამიანებმა, რომლებიც წლების განმავლობაში დევნიდნენ და ზემოქმედებდნენ დირექტორებზე, მასწავლებლებზე. ეს არ იყო პირველი შემთხვევა. უბრალოდ ეს შემთხვევა დამთავრდა ტრაგიკულად. ხელისუფლებამ არ გადადგა შესაბამისი ნაბიჯები, პირიქით დახურულია გამოძიება. გამომდინარე აქედან, ეს დავა ბუნებრივია, გაგრძელდება სტრასბურგში და ასევე, ჩვენ დავაყენეთ საკითხი, რომ მოკვლევა უნდა იყოს კომიტეტზე და ჩვენ ამას მივაღწევთ ადრე თუ გვიან. ეს საკითხი დადგება კომიტეტის სხდომაზე და კომიტეტის ფარგლებში მოხდება მოკვლევა,"- განაცხადა სერგო რატიანმა.